АИШ æмæ Украинæйы хицауадты æхсæн украинаг-америкаг инвестицион фонды сырæзты фæдыл бадзырд хауы 57 минералмæ. Документы афтæ дæр ис фыст АИШ-ы æфсæддон æххуысы тыххæй. Уый фæдыл информаци украинаг рауагъдад «Европейская правда» парахат кæны, кæцы документмæ æркаст.

Публикацийы ис фыст, цæмæй Вашингтоны къухфыст дыууæфарсон бадзырды политикон параметртæ æвæрд цæуынц дыууæ бæстæйы хицауады æхсæн æмкуыстдзинадæн æвæрæнты райрæзты, минералон æрмæгты уæй кæныны æмæ америкаг æххуысы, се æхсæн æфсæддон æххуысы фæдыл, кæцыйы Украинæ фидæны райсдзæн.

Фæлæ «Европейская правда» куыд фыссы, афтæмæй бадзырды бирæ лыстæгдзинæдтæ банысан уыдзæн техникон бадзырды, кæцы къухфыстмæ нырма цæттæ нæу.

«Европейская правда» афтæ дæр фыссы, цæмæй къухфыст бадзырды параметртæ æмбæлынц уыцы сæйраг пункттæн, кæцытæ бон раздæр премьер-министр Денис Шмыхал æргом кодта. Бадзырд лæмбынæг гаранти дæтты, цæмæй нæ ныхмæлæуд кæны Украинæйы бадзырдтæн Евроцæдисимæ æмæ Украинæйы бæллицтæн Евроцæдисы уæнг суæвынмæ. Евроцæдисимæ Украинæйы бацыды бадзырды ныхмæлæуд куы æрцæуа, уæд АИШ-имæ бадзырды уагæвæрдтæ хъуамæ æркæсой.

Нысаниуæгджын у, цæмæй документ Украинæйы америкаг барадон системæйы дæлбар ма бакæна – быцæутæ æрбæстон кæнынц консультациты бындурыл. Афтæ дæр, документ нæ дæтты приоритетон бартæ америкаг компанитæн, цæмæй райсой лицензитæ Украинæйы минералон ресурсты æрзæткъахæнæн. Уыцы иу рæстæг, америкаг компанитæн хъуамæ уа фадат балхæнын минералтæ аукционты кæнæ бадзырдты уавæрты, кæцытæ æндæр æлхæнæгæй къаддæр æнцонвадат не сты.

Документмæ хаст æрцыд, бадзырдмæ гæсгæ цы минералон æрмæг ист цæуы, уыдоны номхыгъд. Номхыгъды ис 57 минералы: алюминий, сурьма, мышьяк, барит, бериллий, висмут, церий, цезий, хром, кобальт, æфсæйнаг, диспрозий, эрбий, европий, фтор, фторит, гадолиний, галлий, германий, сызгъæрин, графит, индий, иридий, ландий,  литий, лютеций, магний, марганец, неодим, никель, ниобий, палладий, платинæ, калий, празеодим, родий, рубидий, рутений, самарий, скандий, тантал, теллурий, тербий, тулий, зды, титан, вольфрам, уран, ванадий, имитрий, цинк, циркони, нефт, æрдзон газ.

Фæлæ уый хауы æрмæстдæр ног æвæрæнтæм, рæзынады лицензитæм, кæцытæн Украинæ ратдзæн бадзырд йæ тыхы бацæуыны фæстæ. Фарсыты бадзырдмæ гæсгæ, гæнæн ис, æмæ фæуæрæхдæр уа æрдзон æвæрæнты номхыгъд.

Бадзырдмæ нæ хауынц æфтиæгтæ украинаг инфраструктурæйæ, куыд фыццаг бавдыста америкаг фарс. Украинæ æфтиæгтæ, кæцытæ æрцæудзæн лицензитæ уæй кæнынæй æмæ минералон æрзæткъахæнæй хъалонтæ, иумæйаг фондмæ бахардз кæндзæн.

АИШ-ы æххуысы аргъ Украинæйæн нымад æрцæудзæн капиталон æвæрæныл, уыимæ æххуыс хæцæнгарзы системæтимæ, æхсæнгарзæй, технологитæй кæнæ ахуыртæй.

Фæлæ «Европейская правда» куыд нысан кæны, афтæмæй Хицауады Сæрдар цы пункттæ расидтис, уыдонæй иуæй-иутæ разыдзинады нысангонд не сты. Зæгъæм, дзы нæ цæуы фонды фтæкдæттыны принцип, афтæ дæр АИШ-ы хæслæвæрд, цæмæй дæс азы дæргъы фондæй æфтиæгтæ ма иса, фæлæ фондты 100 проценты бахардз кæна Украинæйы реконструкцийы. Банысангонд пункттæ хъуамæ фыст æрцæуой иннæ бадзырдмæ, кæцыйы текстыл ныртæккæ куыст цæуы.