Гуырдзиаг рæстдинон аргъуан 23-æм ноябры сыгъдæг Георгийы хъизæмарæй нысан кæны. Райсомæй æппæт кусæг аргъуанты дæр ацæудзæн бæрæгбоны куывд.

Гуырдзиаг рæстдинон аргъуан сыгъдæг Георгийы бæрæгбон нысан кæны афæдз дыууæ хатт – 6 майы, сыгъдæджы амарыны бон æмæ 23 ноябры, цæлхытыл йæ хъизæмар кæныны бон.

Аргъуаны традицимæ гæсгæ, Сыгъдæг Георги райгуырд æртыккаг æнусы дыккаг æмбисы Каппадокийы, хъæздыг чырыстон бинонты æхсæн. Фæстæдæр, Ромы император Диоклетианы рæстæджы, сси инæлар. Чырыстон диныл хæст адæмы æфхæрд куы райдыдтой, уæд сыгъдæг Георги æрлæууыд императоры раз. Уый фæстæ Ромы дзуæрттæн кувæг император сыгъдæгæй ракуырдта, цæмæй Чырыстийыл нæ сразы уа. Сыгъдæг Георгийы сæр ралыг кодтой 303 азы.