Des Moines Register/Mediacom-ы ног æрфарстмæ гæсгæ, АИШ-ы президентон кандидат Камала Харрис æнæнхъæлæджы ахызт Дональд Трампæй æртæ процентон пунктæй раздæр, уыцы штаты, кæцыйы АИШ-ы раздæры президент Трамп дыууæ хатты фæуæлахиз ис.

28-31 октябры штат Айовайы 808 потенциалон æвзарæгæй æрфарстой. Æрфарсты фæстиуæгæн, Харрисæн ис 47%, Трампæн та – 44%. Сентябры уагъд фæстаг æрфарсты, Дональд Трамп Айовæйы Харрисæй цыппар процентон пунктæй раздæр уыд.

Уымæй уæлдай ма банысан кæнын хъæуы уый, æмæ Des Moines Register-ы æрфарстмæ гæсгæ, Камала Харрис Айовайы штаты сылгоймаг æвзарæгты æхсæн Трампæй 20 процентон пунктæй раздæр у.

Уыцы иу штаты, июны уагъд æрфарстмæ гæсгæ, Трамп 18 баллæй раздæр уыд президент Джо Байденæй, кæцы уæд нымад уыд Демокративон партийы æвæццæгæн кандидатыл.

АИШ-ы раздæры президент Дональд Трамп Айовайы 2016 азы 9 процентæй фæуæлахиз ис, 2020 азы та 8 процентон пунктæй.

Трампы кампани рапарахат кодта расидæн, кæцыйы Des Moines Register-ы æрфарст схуыдта «æргом æнæрастдзинад». Сæ ныхæстæм гæсгæ, сабаты рапарахатгонд Эмерсоны колледжы æрфарст растдæрæй æвдисы Айовайы штаты æвзарджыты зæрдæйы уаг.

1-2 ноябры Эмерсоны колледжы/RealClearDefense-ы æрфарст уыцы иу нымæц æвзарæгты æхсæн равдыста бынтон æндæр фæстиуæг: Трамп 10 баллы размæ цæуы Харрисæй. Банысангонд æрфарсты дæр ис 3-4 проценты рæдыд.

АИШ-ы президентон æвзæрстытæ 5-æм ноябры сырæздзысты.