ЕÆÆО-йы хайадисæг 24 бæстæ иумæйаг фидиуæн рапарахат кодтой, кæцыйы Гуырдзыстонмæ сидынц, ЕÆÆО-йы Мæскуыйы механизмы рекомендацитæ æххæстæй сæххæст кæна.

Иумæйаг фидиуæны текст Стыр Британийы хицауад парахат кæны.

Расидæны ис фыст, цæмæй хыгъдлæвæрды лæвæрд цæуы деталон æмæ æууæнкджын аргълæвæрд Гуырдзыстоны 2024-æм азы уалдзæгæй æрцæугæ цауты фæдыл æмæ бæлвырд рекомендацитæ лæвæрд цæуы Гуырдзыстоны хицауадæн, хайадисæг бæстæтæн æмæ уæрæхдæр дунеон æмæхсæнадæн. Фидиуæны автортæ Гуырдзыстонмæ сидынц, Мæскуыйы механизмы рекомендацитæ æххæстæй сæххæст кæной.

«Фыццаджы дæр, Гуырдзыстоны хицауад хъуамæ æххæст кæна, цæмæй барадхъахъæнджытæ архайой æппæтдунеон стандарттæм гæсгæ æмæ уадзой тагъд, хæдбар æмæ æнæхин фæдагуырдтæ æппæт хъизæмар æмæ æнæзакъонон ахасты фæдыл, æмæ фыдгæнджытæ дзуапп дæттой.

Дыккаг, Гуырдзыстон хъуамæ скусын кæна кæнæ бындуронæй раивын закъондæттынад, кæцы æнæбаст у адæймаджы барты æхсæнадæмон хæстæм, се æхсæн фæсарæйнаг æндæвдады æргомдзинады фæдыл закъæттæ, фæсарæйнаг агентты регистраци æмæ æнгæс ивæндзинæдтæ, кæцытæ хауынц гранттæм, уацхæссæгмæ æмæ политикон хайадистмæ.

Æртыккаг, хицауад хъуамæ йæхи баурома политикон ныхмæлæу-уæгты, журналистты æмæ æхсæнадон дебатты æндæр хайадисджыты æнæбары ахст æмæ уголовон æфхæрдæй, ныууадза æнæбары æвæрд аххосæгтæ æмæ ссæрибар кæна политикон аххосæгтæм гæсгæ ахст чи æрцыд, уыдоны се ‘ппæты дæр.

Цыппæрæм, Гуырдзыстон хъуамæ фæурома тыхархайд оппозицион партиты тобæйы фæдыл, фæстæмæ райса ацы фарстайы фæдыл æркæсинаг куырдиæттæ æмæ сифтонг кæна политикон плюрализмæн æххæст кад.

Фæстагмæ, хыгъдлæвæрды нысангонд цæуы, цæмæй тæрхондоны системæмæ æууæнк сног кæнын хъæуы йæ хæдбардзинад фæтыхджындæр кæнгæйæ, рæстадон тæрхоны гарантитæ сифтонг кæнгæйæ æмæ ахæм институтты реформæ кæнгæйæ, куыд Юстицийы Уæлдæр Совет, ЕÆÆО æмæ Венецийы къамисы рагон рекомендацитæм гæсгæ», – дзырдæуы иумæйаг фидиуæны.

Иумæйаг фидиуæны къухфыстытæ сты: Албани, Австри, Бельги, Канадæ, Чехи, Дани, Эстони, Финлянди, Герман, Исланди, Ирланди, Латви, Лихтенштейн, Литва, Люксембург, Молдави, Черногори, Нидерландтæ, Норвеги, Словени, Швеци, Украинæ, Иугонд Паддзахад æмæ Польша.