Bir neçə ildən sonra Respublika Xəstəxanası ölkənin ən inkişaf etmiş, yüksək səviyyəli və imkanlara malik tibb komplekslərindən birinə çevriləcək – bu haqda səhiyyə naziri Zurab Azaraşvili “Nazir saatı” formatında çıxışı zamanı deyib.

Onun sözlərinə əsasən, artıq Respublika Xəstəxanasının inkişaf planı hazırlanıb və yeni Respublika Xəstəxanası xəstələrin və tibb işçilərinin mənafeyini eyni dərəcədə qoruyacaq bir qurum olacaq.

“Plana görə, dövlətin 500 çarpayılıq yüksək texnologiyalı güclü universitet xəstəxanası olacaq. Yeni binada yuxarıda qeyd olunan istiqamətlərə əlavə olaraq mərkəzi qan bankı da fəaliyyət göstərəcək.  Uşaq Onko-Hematologiya Mərkəzi də Respublika Xəstəxanasında yerləşəcək” – deyə səhiyyə naziri bildirib.

Zurab Azaraşvili İnfeksion Patologiya, QİÇS və Kliniki İmmunologiya Mərkəzinin yeni binasında aparılan və ilin sonunadək başa çatdırılacaq yenidənqurma və reabilitasiya işlərindən danışıb.

“Tibb müəssisəsi ən müasir tibbi texnologiyalarla təchiz olunacaq və o, yoluxucu xəstəliklər xəstəxanasının standartlarına tam cavab verəcək. Bu məkanda həm böyüklər, həm də uşaqlar üçün müasir standart, yüksək texnologiyalı yoluxucu xəstəliklər mərkəzi və onun komandası yerləşəcək. Ən yüksək standartlara cavab verən laboratoriya, qəbul və stasionar şöbələr təşkil olunacaq” – Zurab Azaraşvili bildirib.