Gürcüstanın səhiyyə naziri Zurab Azaraşvili hələ də tənzimləmə agentliyinin bazasına qoşulmayan əczaçılıq şirkətlərinə müvafiq sanksiyalar tətbiq olunacağını bildirib.

O, şirkətlərə xəbərdarlıq edilməsinin rasional müddətinin başa çatdığını qeyd edib.

“Ölkədə 3000-ə yaxın aptekimiz var və bazarda 7000 müxtəlif adda dərman dövriyyədədir. Martın 15-dən topdan və ya pərakəndə əczaçılıq şirkətləri öz bazalarını nazirliyə açmağa borcludurlar ki, görək idxaldan hansı qalıqlar var, dərmanların qiymətləri nədir. Müvafiq olaraq, süni qıtlığın yaradılması, qiymət artımı və ya istinad qiymətlərinin formalaşmasının pozulması ilə bağlı ola biləcək mexanizmlər hazırlamışıq. Şirkətlər tədricən qoşulurlar, hərçənd ağlabatan bütün xəbərdarlıq müddətləri keçib. İki həftədən çox vaxt keçdi və bu gündən etibarən bu qərara əməl etməyən bütün şirkətlərə qanunla bizə verilən müxtəlif sanksiyalar tətbiq edəcəyik. Bununla bağlı cavab daha sərt olacaq. Hələ noyabr ayında şirkətlər bilirdilər ki, biz bununla bağlı tədbirlər görməyə başlamışıq və noyabrın sonunda qanunda da yazılıb ki, onların bu öhdəliyi var. Müvafiq olaraq, istər defisitə nəzarət, istərsə də qiymətə nəzarəti daha effektiv edə biləcəyik. Təəssüf ki, son vaxtlar o qədər məsuliyyətsiz faktlar var idi ki, hər şey ola bilər, hərçənd biz bunu cavabsız buraxmayacağıq” -deyə Zurab Azaraşvili açıqlayıb.