NATO-nun baş katibi Yens Stoltenberqin sözlərinə görə, Rusiya prezidenti Vladimir Putin müharibəyə son qoymalı və əsl diplomatiyaya qoşulmalıdır.

Onun sözlərinə görə, NATO müttəfiqləri Ukraynaya güclü dəstək və Rusiyaya qarşı görünməmiş sanksiyalar tətbiq etməklə bu böhrana cavab veriblər.

” Prezident Putinin Ukraynaya qəddarcasına müdaxiləsi hər gün ölüm və dağıntılara səbəb olur. Müttəfiqlər cəsur Ukrayna xalqını dəstəkləməkdə və Kremlin qəddarlığına qarşı birlikdə dururlar. Putin bu müharibəyə son qoymalı, yardıma icazə verməli, mülki şəxslər üçün təhlükəsiz yol yaratmalı və real diplomatiyaya qoşulmalıdır. NATO müttəfiqləri Ukraynaya güclü dəstək və Rusiyaya qarşı görünməmiş sanksiyalar tətbiq etməklə bu böhrana cavab veriblər. NATO müttəfiqləri qorumaq üçün sürətlə və vahid şəkildə hərəkət edir. Müttəfiqlərin yüz minlərlə əsgəri yüksək hazırlıq vəziyyətindədir. Avropada 100.000 Amerika əsgəri var. 40.000 əsgər birbaşa NATO komandanlığı altında, əsasən Alyansın şərq cinahındadır. Qoşunlar şimal zonasında və Aralıq dənizində beş təyyarədaşıyandan ibarət zərbə qrupu da daxil olmaqla hava və dəniz dəstəyinə malikdir. Sabah əlavə qərarlar verəcəyik. Liderlərin sabah bütün istiqamətlərdə NATO-nun mövqelərinin gücləndirilməsinə dəstək verəcəklərini gözləyirəm ki, bu da alyansın şərqində, quruda, havada və dənizdə qüvvələrin artırılması deməkdir. Birinci, NATO-nun dörd yeni döyüş qrupunun Bolqarıstan, Macarıstan, Rumıniya və Slovakiyada yerləşdirilməsidir. Baltikyanı ölkələr və Polşadakı qoşunlarımızla birlikdə bu o deməkdir ki, bizim Baltikdən Qara dənizə qədər tamamilə şərq cinahda səkkiz çoxmillətli döyüş qrupumuz olacaq. Təhlükəsizliyimiz qarşısında yeni bir reallıq var” -deyə
Stoltenberq bildirib.

Yens Stoltenberqin sözlərinə görə, sabah NATO liderləri Ukraynaya dəstəyi bir daha təsdiq edəcəklər.

” Ukraynanın BMT Nizamnaməsinə uyğun olaraq müdafiə hüququ var. Biz ukraynalılara bu hüququ qorumaqda kömək edirik. 2014-cü ildən müttəfiqlər Ukrayna hərbçilərinə təlim keçirdilər və onların imkanlarını əhəmiyyətli dərəcədə gücləndiriblər. İndi bunu praktikada böyük cəsarətlə istifadə edirlər. Ötən ay müttəfiqlər hərbi dəstəyi artıraraq, tank əleyhinə, hava hücumundan müdafiə sistemləri, pilotsuz uçuş aparatları, yanacaq və silahlarla, həm də maliyyə yardımı və milyonlarla qaçqına ev sahibliyi etməklə kömək edirlər. Əminəm ki, sabah liderlər kibertəhlükəsizlik baxımından , həmçinin Ukraynanı kimyəvi, bioloji, radioloji və nüvə təhlükələrindən qorumağa kömək edəcək avadanlıqlarla təmin etməklə bağlı əlavə yardımı dəstəkləyəcəklər. Müharibənin Ukraynadan kənara sıçramaması və NATO-Rusiya münaqişəsinə çevrilməməsi üçün məsuliyyət daşıyırıq. Bu, daha çox insan tələfatına və dağıntılara səbəb olacaq”- deyə Yens Stoltenberq bildirib.

Bununla yanaşı, Stoltenberq Gürcüstan, Bosniya və Herseqovina da daxil olmaqla, digər tərəfdaşlara dəstəyi artırmaqla bağlı razılaşacaqlarına əmin olduğunu bildirib.

” Əminəm ki, biz Gürcüstan və Bosniya və Herseqovina da daxil olmaqla, Rusiyanın təzyiqi riski altında olan digər tərəfdaşlara dəstəyi artırmağa dair razılaşacağıq. Avropa İttifaqı ilə əməkdaşlıqla, biz onlara öz suverenliklərini və müstəqil qərarlar qəbul etmək hüququnu qorumağa kömək etməliyik. Biz avtoritar idarəçilərin öz məqsədlərinə çatmaq üçün gücdən istifadə etməyə getdikcə daha çox hazır olduqları, əsaslı şəkildə dəyişmiş təhlükəsizlik mühiti ilə qarşı-qarşıyayıq” –deyə Yens Stoltenberq bildirib.

Bununla yanaşı, Stoltenberq Çinin böhrandakı rolunu müzakirə edəcəklərini bildirir.

” Pekin Moskvaya qoşulub və müstəqil dövlətlərin öz yolunu seçmək hüququnu şübhə altına alır. Çin Rusiyaya siyasi dəstəyini, açıq yalan və dezinformasiya yaymaqla təmin edir. Müttəfiqlər Çinin Rusiyanın işğalına maddi yardım göstərə biləcəyindən narahatdırlar. Sabah verilən qərarların uzunmüddətli nəticələri olacaq. Təhlükəsizliyin gücləndirilməsi müdafiə sahəsinə ayrılan vəsaitin artırılmasını tələb edir” -deyə Yens Stoltenberq bildirib.