Xarici İşlər Nazirliyi – AŞPA-nın qətnaməsi obyektiv, faktlara əsaslanan qiymətləndirməyə söykənmir, qərəzli şərhlər, birtərəfli siyasi qiymətləndirmələr və Gürcüstan haqqında yanlış narrativlərin təkrarını ehtiva edir

Hesabat obyektiv və faktlara əsaslanan qiymətləndirməyə söykənmir, qərəzli şərhlər, birtərəfli siyasi qiymətləndirmələr və Gürcüstan haqqında yanlış narrativlərin təkrarını ehtiva edir ki, bu da həm hesabatın qərəzsizliyi, həm də onun hazırlanma prosesi ilə bağlı ciddi suallar yaradır. Bu barədə Gürcüstan Xarici İşlər Nazirliyinin bəyanatında deyilir. Qurum Avropa Şurası Parlament Assambleyasının qətnaməsinə münasibət bildirib.

Xarici İşlər Nazirliyinin bəyanatında qeyd olunur ki, Gürcüstan qarşılıqlı hörmət və etimada əsaslanan, hər iki tərəf üçün faydalı əməkdaşlığa hazır olduğunu bir daha təsdiqləyir və Avropa Şurası institutlarından konstruktiv və ədalətli yanaşma gözləyir.

“Avropa Şurası Parlament Assambleyası (PACE) iyunun 24-də Gürcüstanda demokratik institutların fəaliyyəti haqqında hazırlanmış hesabata əsaslanan qətnamə qəbul edib.

Həmin hesabat obyektiv və faktlara əsaslanan qiymətləndirməyə söykənmir, qərəzli şərhlər, birtərəfli siyasi qiymətləndirmələr və Gürcüstan haqqında yanlış narrativlərin təkrarını ehtiva edir ki, bu da həm hesabatın qərəzsizliyi, həm də onun hazırlanma prosesi ilə bağlı ciddi suallar yaradır.

Xüsusilə narahatedicidir ki, insan hüquqlarının, demokratiyanın və qanunun aliliyinin müdafiəsi məqsədilə yaradılmış beynəlxalq institut getdikcə daha çox siyasi təzyiq aləti kimi istifadə olunur. Belə təcrübə Avropa Şurasının öz nüfuzuna zərbə vurur və təşkilatın ayrı-ayrı strukturlarının qərəzsizliyi ilə bağlı əsaslı şübhələr yaradır.

Demokratiya adı altında demokratik yolla seçilmiş hakimiyyətin nüfuzdan salınmasına cəhdlər, qanuni fəaliyyət göstərən dövlət institutlarının məqsədyönlü tənqidi və seçkilər yolu ilə əldə olunmuş ictimai mandatı görməzdən gəlməyə çalışan siyasi qrupların təşviqi qəbuledilməzdir. Belə yanaşma demokratiyanın möhkəmləndirilməsinə deyil, siyasi qütbləşmənin dərinləşməsinə və radikal proseslərin təşviqinə xidmət edir.

Suveren dövlətin daxili siyasi və hüquqi proseslərinə qərəzli münasibət, eləcə də milli maraqlar nəzərə alınmaqla və konstitusiya prosedurlarına tam əməl edilməklə qəbul edilmiş qanunvericilik qərarlarının siyasi meyarlarla qiymətləndirilməsi yolverilməzdir. Qanunların ləğvinin müvafiq hüquqi arqumentasiya və obyektiv qiymətləndirmə olmadan tələb edilməsi narahatlıq doğurur. Bu, institusional mandatın hüdudlarını aşır və siyasi müdaxilə əlamətləri daşıyır.

Gürcüstan hakimiyyəti ölkənin suverenliyini, konstitusiya quruluşunu və gürcü xalqının demokratik seçimini qətiyyətlə qoruyacaq. Heç bir xarici siyasi təzyiq, dezinformasiya kampaniyası və ya ədalətsiz qiymətləndirmə Gürcüstanın milli maraqlarının, dövlət müstəqilliyinin və demokratik legitimliyinin görməzdən gəlinməsinə əsas ola bilməz.

Gürcüstan Avropa Şurasının məsuliyyətli üzvü və onun əsas dəyərlərinin sadiq müdafiəçisi kimi qarşılıqlı hörmət və etimada əsaslanan, hər iki tərəf üçün faydalı əməkdaşlığa hazır olduğunu bir daha təsdiqləyir və Avropa Şurası institutlarından konstruktiv və ədalətli yanaşma gözləyir”, – deyə Gürcüstan Xarici İşlər Nazirliyinin bəyanatında bildirilir.