Volodimir Zelenski – Ukraynanın NATO-ya üzv olması Avropanın təhlükəsizliyinin təminatıdır, çünki Avropanın hələlik bu cür güclü ordusu yoxdur

Ukraynanın NATO-ya üzv olması Avropanın təhlükəsizliyinin təminatıdır, çünki Avropanın hələlik bu cür güclü ordusu yoxdur, – bu barədə Ukrayna Prezidenti Volodimir Zelenski bildirib.

Ukrayna Prezidenti həmçinin ABŞ-da Amerika qoşunlarının Avropadakı gələcək rolu ilə bağlı davam edən müzakirələrdən danışıb.

Zelenskinin qeyd etdiyi kimi, belə bir sual yaranır: Birləşmiş Ştatlar Rusiya təhlükəsini nəzərə alaraq qitədəki varlığını artıracaq, yoxsa əksinə, onu azaldacaq?

Zelenski daha bir arqument gətirib — Ukraynanın üzvlüyü sayəsində NATO-nun güclənməsi. Bu, təkcə silaha deyil, həm də Ukraynanın hərbi texnologiyalarına, döyüş təcrübəsinə və ordunun potensialına aiddir. Ukrayna prezidenti „Rusiyanın təhlükəsizlik zəmanətləri“ məsələsini də xatırladıb. O bildirib ki, Rusiya ilə danışıqlardan sonra Amerika tərəfi tez-tez Ukraynanın ABŞ-dan təhlükəsizlik zəmanətləri və Avropadan maliyyə dəstəyi ala biləcəyi mövqeyi ilə qayıdır, Rusiya isə bu məsələni öz zəmanətləri ilə əlaqələndirir.

“Bir tərəfdən, təcavüzkarın təhlükəsizlik zəmanətləri tələb etməsi qəribə səslənir. Bəli, lakin bu həm də ondan xəbər verir ki, onlar artıq özlərini müharibənin əvvəlindəki kimi və ya zənn etdikləri qədər güclü hiss etmirlər”, – deyə Zelenski bildirib.

Ukrayna prezidenti hesab edir ki, Ukraynanın NATO-ya üzv olması Rusiya üçün müəyyən bir “zəmanət” yaradacaq, çünki Ukrayna işğal olunmuş əraziləri hərbi yolla geri qaytara bilməyəcək və ərazi məsələləri diplomatik yolla həll edilməlidir.

“Buna görə də, mənim fikrimcə, NATO məsələsi bütün tərəflər üçün aktualdır. İnanıram ki, NATO və Avropa İttifaqı məsələsi bu dəhşətli müharibədən çıxış yollarından biri ola bilər”, – deyə Ukrayna prezidenti qeyd edib.