Rusiyanın Volqoqrad şəhərində Ukrayna dronları neft emalı və raket zavodlarına hücum edib.

Hücumdan sonra Volqoqrad neft emalı zavodu — “Lukoil-Volqoqradneftepererabotka” zədələnib və yanğın baş verib. Bu, Volqoqrad regionunda ən böyük neft emalı zavodudur və Lukoil şirkətinin əsas aktivlərindən biridir.

Zavod ildə 15 milyon tondan çox neft emal edir. O, neftin dərin emalı üzrə ixtisaslaşıb və benzin, dizel və aviasiya yanacağı, mazut, bitum və digər neft məhsulları istehsal edir. Zavoda əvvəllər də bir neçə dəfə dron hücumu edilib, sonuncusu isə 2026-cı ilin fevralında baş verib.

Hücumun hədəflərindən biri də Rusiyanın müdafiə sənayesinin ən böyük və ən məxfi raket istehsal müəssisələrindən biri olub. Bu müəssisə tam istehsal dövrünü əhatə edən silah istehsalı ilə məşğuldur — dizayn, tədqiqat və inkişafdan başlayaraq kütləvi istehsal mərhələsinə qədər.

Hadisə ilə bağlı Rusiya mediası da məlumat yayıb. Onların məlumatına görə, Ukrayna dronlarının hücumu nəticəsində Volqoqrad vilayətinin Voljski şəhərində bir nəfər ölüb, bir nəfər yaralanıb. Rusiya mediası həmçinin bildirir ki, Volqoqradda Vərşinina küçəsində yerləşən bir binanın sakini də yaralanıb.