Rusiya prezidenti Vladimir Putin sentyabrın 3-də Monqolustana rəsmi səfər edəcək.

Kremlin məlumatına görə, Putin Monqolustana prezident Uxnaqin Xurelsuxun dəvəti ilə səfər edir. O, Sovet və Monqolustan qoşunlarının Yaponiya silahlı qüvvələri üzərində qələbəsinə həsr olunmuş bayram tədbirlərində iştirak edəcək.

Kremlin press-relizində qeyd olunduğu kimi, danışıqlar zamanı Rusiya və Monqolustan prezidentləri Rusiya və Monqolustan arasında universal strateji tərəfdaşlıq münasibətlərinin inkişaf perspektivlərini müzakirə edəcək, həmçinin cari beynəlxalq və regional problemləri müzakirə edəcəklər.

İkitərəfli sənədlərin imzalanması planlaşdırılır.

Vladimir Putin Monqolustan parlamentinin sədri və baş nazirlə də görüşəcək.

Xatırladırıq ki, avqustun əvvəlində ABŞ dövlət katibi Entoni Blinken regional tur çərçivəsində Monqolustanda səfərdə olub. Bundan əvvəl Monqolustanın xarici işlər naziri Vaşinqtona gəlib və bu zaman ölkələr arasında strateji dialoqun başlanması elan edilib.