Gürcü diasporu öz əlaqələri və müasir xalq diplomatiyasının alətləri ilə Gürcüstanın Avropaya inteqrasiyası və dönməz Qərb dövlətinin qurulması yolunda strateji əhəmiyyətə malik resursdur-bu barədə “Dayanıqlı İqtisadi Bərpa” adlı yerli iqtisadi inkişaf konfransında xarici işlər nazirinin müavini Vladimer Konstantinidi çıxışında bildirib.

Konstantinidi ölkə iqtisadiyyatının inkişafı prosesinə xaricdə yaşayan Gürcüstan vətəndaşlarının cəlb edilməsinin vacibliyinə diqqət çəkib. Nazir müavini bildirib ki, Gürcüstanın dövləti və Xarici İşlər Nazirliyi tərəfdaş beynəlxalq təşkilatlarla birlikdə gürcü diasporunun nümayəndələri ilə fəal ünsiyyətə, qarşılıqlı faydalı əməkdaşlığın qurulmasına və xaricdə yaşayan həmvətənlərimizin vətənlə sıx əlaqəsinin təmin edilməsinə xüsusi diqqət yetirir.

“Biz dövlət qurumları və beynəlxalq tərəfdaş təşkilatlarla əməkdaşlıqla gürcü diasporunun ölkənin iqtisadi inkişaf prosesində iştirakını yeni səviyyəyə qaldırmışıq. Xarici İşlər Nazirliyi hər il diaspor nümayəndələrini Gürcüstanın investisiya mühiti ilə yaxından tanış etmək, Gürcüstanda biznes fəaliyyəti ilə bağlı yenilənmiş məlumatları bölüşmək, diasporu müvafiq qurumlarla və ya dövlət proqramları ilə əlaqələndirmək, və davamlı əməkdaşlıq əlaqələrini genişləndirməyə xidmət edən biznes-forum və iqtisadi xarakterli tədbirlərə ev sahibliyi edir. Nəticədə biz diasporun fəallaşması, dövlətə inamın artması və diaspora investisiya təşəbbüslərinin reallaşmasına nail olduq” – deyə Vladimer Konstantinidi bildirib.

Xarici işlər nazirinin müavini çıxışında xaricdə yaşayan Gürcüstan vətəndaşlarının iştirakının xarici sərmayələrin cəlb edilməsini, xarici işgüzar dairələrin yeni investisiya layihələri və ölkə üçün prioritet sektorlar ilə maraqlanmasını təşviq etdiyini vurğulayıb. Vladimer Konstantinidi bildirib ki, xaricdə yaşayan həmvətənlər ölkənin inkişafına sərmayə qoymağın ən yaxşı nümunəsidirlər.

Tbilisi meriyasının təşəbbüsü ilə “Dayanıqlı İqtisadi Bərpa”adlı yerli iqtisadi inkişaf forumu keçirilib.

Gürcüstan Xarici İşlər Nazirliyinin mətbuat xidməti məlumat yayır.