Vaja-Pşavela metrosunun yaxınlığında vətəndaşlar toplaşır. Onların dediklərinə əsasən, “Pride” festivalına etiraz edirlər.

Onların sözlərinə görə, aksiya dinc xarakter daşıyacaq, lakin tədbirin baş tutmasına imkan verməyəcəklər.

“Ölkəmizi xilas etmək lazımdır. Bizim Gürcüstan ənənəvi ölkədir, Tanrı Anasının ölkəsidir. Bütün dünya Gürcüstanla fəxr edir və biz belə qürurlu ölkə olaraq qalmaq üçün onu qoruyub saxlamalıyıq”, – mitinq iştirakçılarından biri deyib.

Hüquq-mühafizə orqanlarının əməkdaşları hadisə yerinə səfərbər olunub.

“Tbilisi Pride” dünən bəyanat yayaraq küçə yürüşlərinin olmayacağını və festivalın qeydiyyatdan keçmiş qonaqlar üçün özəl, qapalı ərazidə keçiriləcəyini və təhsil, mədəni və sosial xarakter daşıyacağını bildirib.

Bundan əlavə, Gürcüstanın Daxili İşlər Nazirliyi iyulun 8-də planlaşdırılan tədbirlərlə bağlı açıqlama yayıb.

Agentlik qeyd edib ki, iyulun 8-də nəzərdə tutulan qapalı tədbirin konkret məkanda, qapalı yerdə təhlükəsiz şəraitdə keçirilməsi üçün nazirliyin nümayəndələri görüşün təşkilatçıları ilə əlaqə saxlayır. Onların məlumatlarına görə, Daxili İşlər Nazirliyi tədbirin təhlükəsiz formatda keçirilməsini təmin etmək, o cümlədən hər bir şəxsin qanunla nəzərdə tutulmuş çərçivələri aşmayan ifadə və sərbəst toplaşmaq azadlığının qorunması üçün bütün lazımi tədbirləri görəcək.

Daxili İşlər Nazirliyi bildirir ki, onlar aksiyanın təşkilatçılarını və iştirakçılarını qanunla icazə verilən toplaşma və nümayiş keçirmək hüququndan kənara çıxmamağa çağırır.