Brüsseldəki görüşlər bizə tövsiyələrin yerinə yetirilməsi baxımından hansı mövqedə olduğumuzu qiymətləndirmək və gələcək addımları planlaşdırmaq imkanı verəcək -bu barədə Gürcüstanın Belçika Krallığında və Lüksemburq Böyük Hersoqluğunda fövqəladə və səlahiyyətli səfiri, Gürcüstanın Avropa İttifaqı yanında missiyasının rəhbəri Vaxtanq Maxaroblişvili İlia Darçiaşvilinin Brüsselə işgüzar səfərini dəyərləndirərkən bildirib.

O, Aİ təsisatlarının yüksək səviyyəli nümayəndələri ilə görüşün olduqca vacib olduğunu söyləyib.

“Yay ​​tətilindən əvvəl Qonşuluq Siyasəti və Genişlənmə üzrə Avropa komissarı Varhei ilə yüksək səviyyədə əlaqə qurmağımız vacibdir. Görüşün Avropa Komissiyasının Qonşuluq Siyasəti və Genişlənmə Danışıqları üzrə Baş direktorluğunun baş direktoru ilə baş tutması da çox vacibdir. Görüşlər, bir tərəfdən, qiymətləndirmək, durduğumuz yeri nəzərdən keçirmək, digər tərəfdən də növbəti həftələr üçün gələcək addımları planlaşdırmaq imkanı verəcək. Təbii ki, bu görüşlər Avropa Komissiyası 12 prioritetin həyata keçirilməsi ilə bağlı Avropa Şurasına şifahi məruzə təqdim etdikdən sonra baş tutacaq.

Oktyabrda Avropa Komissiyasının genişlənmə paketi çərçivəsində Gürcüstanla bağlı tam miqyaslı, geniş hesabat təqdim edəcəyindən irəli gələrək, mövqelərdə konsensusun olması çox vacibdir. Artıq ilin sonunda Gürcüstanın Avropa İttifaqına daxil olmaq baxımından daha bir addım atması, daha da yaxınlaşmağımız və namizəd ölkə olmağımız üçün Avropa Şurasının qərarını gözləyirik”-deyə Vaxtanq Maxaroblişvili bildirib.

Gürcüstanın xarici işlər naziri İlia Darçiaşvili iyulun 18-19-da Brüsseldə işgüzar səfərdə olacaq. Nazirlik səfər çərçivəsində XİN rəhbərinin Avropa İttifaqının təsisatlarının yüksək səviyyəli nümayəndələri ilə görüş keçirəcəyinə dair məlumat yayır. Qurumun yaydığı məlumatda görüşlər çərçivəsində Gürcüstanın Avropa İttifaqına inteqrasiya prosesi və ikitərəfli münasibətlərin gündəliyinin müzakirə olunacağı deyilir.