Vake parkında baş verən hadisə ilə əlaqədar “Greenservice Plus”ın direktoru Laşa Purtsxvanidze yenidən Vake-Saburtalo polis bölməsində dindirilib.

Purtsxvanidze ifadə verdikdən sonra jurnalistlərə istintaq hərəkətlərinin davam etdiyini və yəqin ki, onların yenidən sorğuya çağırılacaqlarını açıqlayıb.

Jurnalistlərin suda 220 volt enerji təchizatı blokunun niyə quraşdırıldığı sualına, Purtsxvanidze belə cavab verib:

“Hər yerdə var, Riğe fəvvarəsində də. Gedin və çəkin, italyan mütəxəssislər tərəfindən qurulub. Vahid paylama sistemi var idi, Riğe fəvvarəsinə gedin və çəkin”.

Purtsxvanidzenin sözlərinə görə, hadisənin səbəblərini istintaq müəyyən edəcək.

“Həm quraşdırma zamanı, həm də sonra elektrik enerjisi yoxlanılıb. Əlavə konkret sualları istintaqdan soruşun. İstintaq cavab verməlidir.

Onsuz da ömrümün sonuna qədər tanrıdan məsuliyyətim var. Bu mərhələdə məsuliyyətin nə olacağı məni maraqlandırmır” – deyə Laşa Purtsxvanidze bildirib.

Oktyabrın 13-də uşaqlar Vake ​​parkında oynayarkən top fəvvarənin içərisinə düşüb və onu götürərkən üç azyaşlını elektrik cərəyanı vurub. Hər üç yaralı klinikaya aparılıb. Yeniyetmələrdən biri, 13 yaşlı qız klinikada dünyasını dəyişib. İki azyaşlı artıq klinikalardan evə buraxılıb.

Baş vermiş hadisə ilə bağlı Daxili İşlər Nazirliyi elektrik və ya istilik enerjisi , qaz, neft və ya neft məhsulları müəssisəsində təhlükəsizlik qaydalarının pozulmasını nəzərdə tutan Cinayət Məcəlləsinin 240-cı maddəsinin birinci hissəsi ilə istintaq başladıb.