Ukrayna Xarici İşlər Nazirliyi Monqolustanı Beynəlxalq Cinayət Məhkəməsinin Roma Statutu ilə verilən öhdəlikləri yerinə yetirməyə və Rusiya lideri Vladimir Putini ölkəyə səfəri zamanı həbs etməyə çağırır.

Ukrayna Xarici İşlər Nazirliyi ümid edir ki, Monqolustan hökuməti “Vladimir Putinin hərbi cinayətkar olması faktını tanıyacaq” və Haaqa məhkəməsi onun ukraynalı uşaqların qaçırılmasında iştirak etdiyi üçün həbs qərarı çıxarıb.

“Ukraynalı uşaqların qaçırılması Putinin və Rusiya Federasiyasının hərbi-siyasi rəhbərliyinin digər nümayəndələrinin məsuliyyətə cəlb edilməli olduğu çoxsaylı cinayətlərdən yalnız biridir. Bu şəxslər Ukraynaya qarşı təcavüzkar müharibənin aparılmasında, ukraynalı xalqa qarşı qəddarlıqda, qətllərdə, təcavüzlərdə, quldurluqda, mülki infrastrukturun bombalanmasında və soyqırımda günahkardırlar”, – Ukrayna Xarici İşlər Nazirliyinin bəyanatında deyilib.

Xarici İşlər Nazirliyi Monqolustanı “məcburi beynəlxalq orderə əməl etməyə” və Putini Haaqa Beynəlxalq Cinayət Məhkəməsinə təhvil verməyə çağırıb.

Putinin Monqolustana səfəri sentyabrın 3-nə planlaşdırılıb. Bu, Haaqa Məhkəməsinin həbs orderi çıxardıqdan sonra, onun Roma Statutunun iştirakçı ölkəsinə ilk səfəridir.