Ukrayna XİN ölkənin xarici işlər nazirinin müavini Evhen Perebiinisa ilə Gürcüstanın Ukraynadakı səfiri Qiorqi Zakaraşvili arasında baş tutmuş görüş barədə məlumat yayır.

Nazirlikdən verilən məlumatda Evhen Perebiinisanın gürcü tərəfinə Kiyev, Lvov, Xarkov, Nikolayev və Qostomel şəhərlərinə generatorlar tədarük etdiyinə, həmçinin 2023-cü ildə davam etdirilməsi planlaşdırılan Gürcüstanda ukraynalı uşaqların sağlamlığının yaxşılaşdırılması proqramlarına görə təşəkkür etdiyi deyilir.

“Nazir müavini Gürcüstanın öz mövqeyinə yenidən baxacağına və Ukraynanı silah və hərbi texnika ilə təmin edən tərəfdaşlar dairəsinə qoşulacağına, eləcə də Tbilisinin Avropa İttifaqının işğalçı dövlətə qarşı tətbiq etdiyi bütün sanksiyalara qoşulacağına ümidvar olduğunu bildirib. Bu kontekstdə o, Gürcüstan və Rusiya arasında birbaşa hava səyahətinin mümkün bərpası ilə bağlı məlumatdan narahatlığını ifadə edib. Öz növbəsində gürcü diplomat Gürcüstanın Rusiya Federasiyası ilə uçuşları bərpa etmək niyyətində olmadığına əmin edib. Evhen Perebiinisa Gürcüstanda həbsdə olan Ukrayna vətəndaşı Mixeil Saakaşvilinin səhhətinin pisləşməsi ilə bağlı məsələni də qaldırıb və gürcü diplomatı  onun müalicə üçün Ukraynaya və ya üçüncü ölkələrə göndərilməsi imkanlarını nəzərdən keçirməyə çağırıb. Tərəflər ikitərəfli əməkdaşlığın digər məsələlərini, konkret olaraq Ukrayna Prezidenti Volodimir Zelenskinin təşəbbüsü ilə irəli sürülmüş sülh düsturunun həyata keçirilməsinə Gürcüstanın cəlb edilməsi imkanlarını müzakirə ediblər, həmçinin Ukrayna-Gürcüstan parlamentlərarası dialoqun aktivləşməsini müsbət qiymətləndiriblər”-deyə Ukrayna Xarici İşlər Nazirliyinin yaydığı məlumatda deyilir.