Gürcü azarkeşlər üçün oktyabrın 11-də Respublika meydanında Tbilisi Meriyasının və Gürcüstanın Futbol Federasiyasının təşkilatçılığı ilə böyük ekran quraşdırılacaq və Ukrayna-Gürcüstan futbol matçının açıq nümayişi keçiriləcək.

Planlaşdırılan tədbirlə əlaqədar qeyd olunan ərazidə nəqliyyatın hərəkəti qadağan olunacaq. Məhdudiyyət oktyabrın 10-u saat 15:00-dan oktyabrın 12-si saat 14:00-dək Rustaveli prospekti ilə Respublika meydanının kəsişməsindən Respublika meydanı ilə Merab Kostava küçəsinin kəsişməsinə qədər qüvvədə olacaq.

Rustaveli prospektindən Kostava küçəsinə doğru hərəkət edən avtomobillər yalnız Mixeil Cavaxişvili və Merab Kostava küçələri istiqamətində hərəkət edə biləcəklər. Cavaxişvili küçəsindən hərəkət edən avtomobillər Tbilisinin Dövlət Konsert Zalı istiqamətində, Kostava küçəsindən isə yalnız Rustaveli prospekti və Azadlıq meydanı istiqamətində hərəkət edə biləcəklər.

İctimai nəqliyyata gəlincə, 359 nömrəli avtobus Vake istiqamətində hərəkət edərkən Cavaxişvili küçəsindən Kostava küçəsi istiqamətində, sonra isə müəyyən olunmuş qrafik üzrə hərəkət edəcək. 457 nömrəli mikroavtobus Besiki küçəsi istiqamətində hərəkət edərkən Cavaxişvili küçəsindən Revaz Tabukaşvili küçəsi istiqamətində hərəkət edəcək, Revaz Lağidze küçəsi ilə Rustaveli prospektinə qoşulacaq və sonra müəyyən olunmuş qrafik üzrə hərəkət edəcək.

Bundan başqa, matç başa çatdıqdan sonra Respublika meydanına toplaşan azarkeşlərə munisipal avtobusların bir hissəsi uzadılmış iş vaxtı ilə xidmət göstərəcək. Xüsusilə, N301, N306, N308, N309, N310, N314, N326, N331, N337, N342, N345, N352, N358, N359, N364, N388, N391 və N392 oktyabrın 12-si saat 02:00 qədər hərəkət edəcəklər. Tbilisi metrosu da gec saatlara qədər işləyəcək.

UEFA Millətlər Liqasının qrup mərhələsinin səfər qarşılaşması oktyabrın 11-də, Poznan şəhərində, Tbilisi vaxtı ilə saat 22:45-də keçiriləcək.

Məlumatı Tbilisi Meriyası yayır.