Tbilisidə, Ağmaşenebeli prospekti 44 ünvanında yeni “Radisson RED Tbilisi” mehmanxanasının açılışı olub.

Mehmanxana köhnə görkəmini qoruyub saxlayan poçtun keçmiş binasında açılıb. Tarixi poçt binası 1920-ci illərə aiddir.

Açılış mərasimində Gürcüstanın Baş naziri İrakli Ğaribaşvili və paytaxtın meri Kaxa Kaladze iştirak ediblər.

Çıxış zamanı hökumət nümayəndələri bunun ölkə iqtisadiyyatının inkişafına növbəti töhfə olacağını qeyd ediblər.

Mehmanxananın baş meneceri Hüsnü Taianci və “Radisson Hotel Group”un Türkiyə, Gürcüstan, Azərbaycan və Şərqi Avropa üzrə regional direktoru Antuan Mubarak bildiriblər ki, bu, Gürcüstanda “Radisson Group”un çətiri altında yaradılan 4-cü oteldir.

“Tbilisi və bu ölkə mənim ürəyimə çox yaxındır. Mən bu gözəl ölkəyə 2008-ci ildən səfər edirəm və ilk dəfə olaraq “Radisson Blu İveria”nı açdıq və “Silk Group” ilə əməkdaşlıq edirik. Biz Tbilisidə dördüncü layihəmizi davam etdiririk və yaxın gələcəkdə daha çox layihə olacaq. Bu gün burada olmağımızın səbəbi budur ki, biz bu ölkəyə inanırıq, onun potensialına, zəngin mədəniyyətinə, memarlığına və gözəlliyinə inanırıq. Layihənin həyata keçirilməsində iştirak edən bütün insanlara təşəkkür etmək istəyirəm. Biz yerli irsi qorumaq, beynəlxalq müasirliyi, eləcə də yerli irsi qorumaq istəyirik. Şəxsən mənim bir livanlı fransız kimi Gürcüstanla, onun mədəniyyəti, qastronomiyası, şərabı ilə ortaq cəhətlərim var. Keçmiş reqbiçi kimi mən Gürcüstana dünya çempionatında uğurlar arzulayıram”, – Antuan Mubarak deyib.