Onkoloji diaqnoz qoyulmuş uşaqların xaricdə müalicə proqramından artıq 37 uşaq yararlanıb, bu, ailələr üçün böyük güzəştdir və düşünürəm ki, bu model bizə gələcəkdə öz nəticələrini göstərəcək, – Səhiyyə nazirinin birinci müavini Tamar Qabunia Gürcüstanın Birinci Kanalının “Aktual şənbə – Maka Tsintsadze ilə” verilişində qonaq olarkən bildirib.

Tamar Qabunianın sözlərinə görə, dövlət, paralel olaraq, onkoloji diaqnoz qoyulmuş uşaqların Gürcüstanda, yerindəcə yüksək keyfiyyətli xidmət ala bilməsi üçün fəal işləyir.

“Ölkədə kadr hazırlığı, klinik bazaların yaradılması gücləndirilməlidir və bu, şübhəsiz ki, gələcəkdə yeni imkanlar yaradacaq. Hamımız başa düşürük ki, bu xidmət Gürcüstanda inkişaf etdirilməlidir və biz daim xarici klinikalardan asılı olmamalıyıq. Biz tibb kadrlarının hazırlanması üzərində işləyirik ki, bu da çox vaxt aparır. Biz klinikalar axtarırıq və buradan gənc kadrların rezidentura proqramına göndərilməsi istiqamətində işləyirik”, – deyə Tamar Qabunia bildirib.

Nazir müavininin bəyanatına görə, əsas məqsəd Gürcüstanda hərtərəfli uşaq onkologiyası xidmətinin yaradılmasıdır və nazirlik bunun üçün fəal işləyir.

Onun sözlərinə görə, üzərində işlənilən yeni komponent simptomları olan şəxslərə aid olacaq.

“Üzərində işlənən yeni komponent simptomları olan şəxslərdir. Yəni, insanda xərçəngin hər hansı xarakterik əlaməti olduqda o, öz ailə həkiminə gedəcək və ilkin müayinədən keçəcək. Bu, ultrasəs və ya rentgenoskopiya müayinəsi ola bilər və xərçəngin şübhəli bir görüntüsü ortaya çıxarsa, bundan sonra xüsusi müayinələrdən keçmək lazımdır, morfoloji, sonra əlavə bahalı radioloji müayinələr, maqnit rezonans müayinəsi və s. Burada, bütün bunların proqram çərçivəsində tətbiqi planlaşdırılır, təbii ki, bu, Avropa və Amerikanın qabaqcıl təcrübə təlimatlarına əsaslanan müvafiq göstərişlərə uyğun olacaq”, – Qabunia bildirib.