Stiv Uitkoff – Ukrayna münaqişəsinin həlli istiqamətində mühüm tərəqqi, o cümlədən əlavə üçtərəfli danışıqların planlaşdırılması məsələsində nailiyyətlər əldə olunub

ABŞ prezidentinin xüsusi nümayəndəsi Stiv Uitkoff özünün və Amerika liderinin kürəkəni Cared Kuşnerin Moskva və Kiyevə səfərlərindən sonra Ukrayna münaqişəsinin həlli istiqamətində davam edən danışıqlar prosesində mühüm irəliləyişin olduğunu bəyan edib.

“ABŞ prezidenti Donald Trampın tapşırığı ilə amerikalı danışıqçıların nümayəndələri Rusiya və Ukrayna arasındakı müharibəyə son qoymaq məqsədilə növbəti dialoqa töhfə vermək üçün Moskva və Kiyevə səfər ediblər”, – Uitkoff “X“ sosial şəbəkəsində yazıb.

“Əlavə üçtərəfli danışıqların planlaşdırılması da daxil olmaqla, əhəmiyyətli irəliləyiş əldə olunub”, – Uitkoff deyib.

O, həmçinin bildirib ki, Tramp “davamlı və uzunmüddətli sülhün” əldə olunmasına töhfə vermək üçün səylərini əsirgəmir.

ABŞ prezidentinin xüsusi nümayəndəsi təsdiqləyib ki, onunla və Kuşnerlə birlikdə Rusiya prezidenti Vladimir Putin və Ukrayna prezidenti Volodimir Zelenski ilə keçirilən görüşlərdə Ağ Evin Milli Təhlükəsizlik Şurasının, ABŞ Dövlət Departamentinin və Maliyyə Nazirliyinin əməkdaşları da iştirak ediblər.

Uitkoffun sözlərinə görə, Kiyevdə “növbəti addımları razılaşdırmaq” üçün Böyük Britaniya, Almaniya və Fransa liderlərinin milli təhlükəsizlik məsələləri üzrə müşavirləri də Amerika nümayəndə heyətinə qoşulublar.