Gürcüstanın Daxili İşlər Nazirliyinin Mərkəzi Kriminal Polis Departamentinin Mütəşəkkil Cinayətkarlıqla Mübarizə Baş İdarəsinin, Dövlət Təhlükəsizliyi Xidmətinin və Baş Prokurorluğun əməkdaşları tərəfindən birlikdə aparılmış əməliyyat-istintaq tədbirləri nəticəsində kompüter sisteminə icazəsiz daxil olma faktı üzrə 2001-ci il təvəllüdlü B.K. saxlanılıb.

“Aparılmış kompleks istintaq hərəkətləri nəticəsində təqsirləndirilən B.K.-nın fərdi məlumatları ələ keçirmək məqsədilə “Silknet” SC-nin kompüter sisteminə kiberhücum həyata keçirdiyi müəyyən edilib.

Təqsirləndirilən şəxs kompüter sisteminə icazəsiz daxil olmaq yolu ilə adıçəkilən şirkətin 5000-ə yaxın istifadəçisinin şəxsiyyət vəsiqəsinin rəqəmsal surətini əldə edib və qanunsuz yolla internetdə satmağa cəhd edib”- Daxili İşlər Nazirliyindən bildirilib.

Kompüter sisteminə icazəsiz daxil olma faktı ilə əlaqədar Gürcüstan Cinayət Məcəlləsinin 284-cü maddəsinin 3-cü hissəsi ilə istintaq aparılır. Cinayət altı ilədək müddətə azadlıqdan məhrum etmə cəzasını nəzərdə tutur.