Gürcüstan parlamentinin sədri Şalva Papuaşvili nümayəndə heyəti ilə birlikdə sentyabrın 24-27-də Rumıniyada rəsmi səfərdə olacaq. Bu barədə məlumatı Gürcüstan parlamentinin mətbuat xidməti yayıb. Onların sözlərinə görə, səfər çərçivəsində Gürcüstan parlamenti sədrinin Rumıniya Senatının prezidenti, Deputatlar Palatasının sədri vəzifəsini icra edən şəxs və parlamentin hər iki palatasının komitələrinin nümayəndələri ilə ikitərəfli görüşləri keçiriləcək.

“Gürcüstan parlamentinin sədri plenar iclasda Senatın üzvləri qarşısında çıxış edəcək. Səfər çərçivəsində Şalva Papuaşvili Rumıniyanın baş naziri və xarici işlər naziri ilə görüşəcək.

Parlamentin sədri Avro-Atlantik Dayanıqlılıq Mərkəzinin prezidenti tərəfindən təşkil olunacaq dəyirmi masada da iştirak edəcək.

Gürcüstan parlamentinin nümayəndə heyətinə Şalva Papuaşvili ilə yanaşı, Davit Sonqulaşvili, İsko Dasen, Genrietta Tsitsava və Yekaterine Sefaşvili daxildir.