Venesiya Komissiyasında de-oliqarxizasiya haqqında Ukrayna qanununun hansı mərhələdə olduğunu öyrənəcəyik və bundan irəli gələrək hərəkət edəcəyik- bu barədə Gürcüstan parlamentinin sədri Şalva Papuaşvili açıqlayıb.

Şalva Papuaşvili Gürcüstan parlamentinin sədrinin kabinetinin bununla bağlı artıq Venesiya Komissiyasına müraciət etdiyini qeyd edib.

“Düzünü desəm, Avropa İttifaqı ilə 12 bəndlə bağlı ünsiyyətimiz var və Avropa İttifaqından bu barədə heç bir məlumat almamışıq. Amerika Birləşmiş Ştatlarının səfirinin Venesiya Komissiyası ilə bağlı dedikləri yenilikdir. Hazırda Ukrayna qanununun hansı mərhələdə olduğunu öyrənmək üçün mənim kabinetim artıq Venesiya Komissiyasına müraciət edib. Bu qanunun Komissiyanın saytında da yerləşdirildiyini və nəticənin gözlənildiyini bilirik. Bu səbəbdən vəziyyətin necə olduğunu öyrənib ona uyğun hərəkət edəcəyik. Ümumiyyətlə, aydındır ki, bizim qanun Ukrayna qanununun surətidir, bu səbəbdən Venesiya Komissiyasından əlavə rəy eşitməyə ehtiyac yox idi” -deyə Papuaşvili bildirib.

ABŞ-ın Gürcüstandakı səfiri Kelli Deqnan bu gün bildirib ki, Ukrayna Venesiya Komissiyasına göndərilmiş “De-oliqarxizasiya” qanununu geri götürüb və indiki mərhələdə nəticəni gözləmir.