Gürcüstan parlamentinin sədri Şalva Papuaşvili plenar iclasda parlamentin fəaliyyəti baxımından cari ili dəyərləndirib.

O, parlament üçün kifayət qədər məhsuldar il olduğunu bildirib.

“Cari ili, parlamentin gördüyü işləri qısaca dəyərləndirmək istərdim. Qanun yaradıcılığı baxımından parlamentimiz 291 qanun, o cümlədən Avropa İttifaqının tövsiyələrini yerinə yetirmək üçün 82 qanun qəbul edib. Beləliklə, qanun yaradıcılığı baxımından fəaliyyətimiz məhsuldar olub. Parlament nəzarətinə gəlincə, hökumət üzvləri parlamentdə 20 dəfə, o cümlədən baş nazir üç dəfə plenar iclasda olub. Bu 20 çıxışdan 13-ü Nazir Saatı və ya məruzə formatında, yeddisi interpelyasiya qaydasında olub və müxalifət də bundan aktiv şəkildə yararlanıb. Parlament qarşısında cavabdehlik daşıyan qurumların 20-dən çox hesabatını dinlədik, yeddisi artıq başa çatmış 12 komitə tədqiqatının təşəbbüsü qaldırıldı. Həmçinin 4 istintaq komissiyasının təşəbbüsü qaldırılıb, təəssüf ki, onların heç biri plenar iclasa çıxarılmayıb. Bu baxımdan, bu təşəbbüs hələ də havadadır.

Səfərlərə gəlincə, parlament sədrinin 18, daimi parlament nümayəndə heyətlərinin 43, dostluq qruplarının isə 5 səfəri baş tutub. Biz 32 nümayəndə heyətini qəbul etdik, onlardan dördü parlament sədrinin rəhbərliyi ilə gəldi. Parlamentdə 300-ə yaxın qrup qonaq olub, təkcə iclas zalında 4900 məktəbli və tələbə də daxil olmaqla 5300-dən çox ziyarətçimiz olub, onlar parlamentə gələrək onun fəaliyyəti ilə tanış olublar. Hamınıza parlament fəaliyyətinizə görə təşəkkür etmək istəyirəm və gələn ilin daha intensiv və maraqlı keçməsini arzulayıram”- deyə Papuaşvili açıqlayıb.