Gürcüstan parlamentinin sədri Şalva Papuaşvili Avstriya Senatının Prezidenti Klaudiya Arpa ilə görüşüb.

Görüşdə Avstriya və Gürcüstan parlamentləri arasında əməkdaşlıq, anlaşma memorandumu çərçivəsində cari və planlaşdırılan tədbirlər, Avstriya Parlamenti tərəfindən dəstəklənən “Demokratiya vorkşopu” proqramının gedişi, iki ölkənin ali qanunvericilik orqanlarının fəaliyyəti müzakirə edilib.

Şalva Papuaşvili və Klaudiya Arpa Avstriya Senatının Prezidentinin Gürcüstana planlaşdırılan səfərindən danışıblar.

Görüşdə həmçinin Gürcüstan tərəfdən nümayəndə heyətinin üzvləri, deputatlar: Gürcüstan parlamentinin Avropa Şurası Parlament Assambleyasındakı daimi nümayəndə heyətinin rəhbəri İrakli Çikovani və Ətraf Mühitin Müdafiəsi və Təbii Resurslar Komitəsinin sədri, Gürcüstan-İrlandiya Parlament Dostluq Qrupunun rəhbəri Maia Bitadze iştirak ediblər.