Gürcüstan parlamentinin sədri Şalva Papuaşvili Almaniyanın Saksoniya-Anhalt parlamentinin prezidenti Qunnar Şellenberqer ilə görüşüb.

Parlamentin mətbuat xidmətindən verilən məlumata görə, tərəflər Gürcüstan və Almaniya arasında zəngin tarixi-mədəni əlaqələrdən, eləcə də diplomatik əlaqələrin bərpasının 30-cu ildönümündən danışıblar. Onlar mövcud əməkdaşlıq layihələrini və tərəfdaşlığın dərinləşdirilməsi imkanlarını nəzərdən keçiriblər.

Şalva Papuaşvili Qunnar Şellenberqeri parlamentin fəaliyyəti ilə tanış edib və qanunverici orqanlar arasında əlaqələrin gücləndirilməsini vurğulayıb. Parlamentin sədri Avropa İttifaqının tövsiyələrinin yerinə yetirilməsi ilə bağlı Gürcüstanın səyləri və planlarından da danışıb.

Şalva Papuaşvili Almaniyanın Gürcüstanın ərazi bütövlüyünə və Avropanın gələcəyinə verdiyi dəstəyə görə minnətdarlığını bildirib.