Şindzo Abe Gürcüstanın dostu , güclü beynəlxalq fiqur idi, bütün Gürcüstan şokdadır-bu barədə Gürcüstan prezidenti Salome Zurabişvili “Twitter” sosial şəbəkəsində yazır.

Prezident onun ailəsinə, yaxınlarına və ölkəsinə başsağlığı verir.

“Dəhşətli faciə. Bütün Gürcüstan şokdadır. Şindzo Abe Gürcüstanın dostu, eyni zamanda güclü beynəlxalq fiqur idi. Dərin hüznlə başsağlığı verirəm” -deyə Salome Zurabişvili sosial şəbəkədə yazır.

Yaponiyanın sabiq baş naziri Şindzo Abe hücum zamanı aldığı xəsarətlərdən dünyasını dəyişib. Nara şəhərində, seçki kampaniyası çərçivəsində tədbirlərin birində çıxış edərkən Şindzo Abenin kürək nahiyəsinə silahdan atəş açılıb.

Yerli mətbuat, polisin 41 yaşlı kişini hadisə yerində saxladığına dair məlumat yayır. Saxlanılan şəxs Nara şəhərinin sakini Tedzuia Yamaqamidir . Yerli mətbuat onun Yaponiyanın Dəniz Müdafiə Qüvvələrinin keçmiş üzvü olduğunu yazır.

Şindzo Abe 2006-2007 və 2012-2020-ci illərdə baş nazir vəzifəsini icra edib. O, Yaponiya tarixində bu vəzifədə ən uzun müddət xidmət göstərib. Şindzo Abe 2020-ci ildə sağlamlıq vəziyyətinə görə istefa verib.