Qoy dualarınızla qəlbimizdə əmin-amanlıq, evlərimizdə firavanlıq, bütün yer üzündə sülh bərqərar olsun – bu barədə Gürcüstan Prezidenti Salome Zurabişvilinin katolikos-patriarx İkinci İlianın taxta çıxması günü münasibətilə təbrik məktubunda deyilir.

“Dərin ehtiramla sizi əlamətdar tarix, taxta çıxmağın 46-cı ildönümü münasibətilə təbrik edir, sizinlə birlikdə ümumi Gürcüstanı təbrik edirəm.

Gürcüstan kilsəsinin rəhbəri kimi keçdiyiniz bu illər Gürcüstan üçün çətin idi, eləcə də Gürcüstanın mənəvi atası olan sizin üçün çətin idi. Dualarınız və dəstəyiniz imanımızı gücləndirdi və möhkəmləndirdi, çətin anlarda bizə təsəlli verdi. Bu gün də sizin qayğınız milliyyətindən və əqidəsindən asılı olmayaraq hamını əhatə edir, xeyirxahlıq və ədalət, sülh və hörmət ideallarına ilham verir. Xalqın sizə olan sevgisi, sədaqəti və inamı həm ölkə həyatında, həm də hər bir mənəvi övladınızın həyatında xidmətlərinizi ən yaxşı ifadə edir.

Bu yaxınlarda vətənimiz əsrlər boyu can atdığımız əziz məqsədə doğru mühüm addım atdı. Yenə də sizin dualarınızla biz bu yolu ləyaqətlə davam etdirəcəyik, cəmiyyətin birliyini, tolerantlığı və qarşılıqlı sevgini möhkəmləndirəcəyik.

Bu mühüm gün münasibətilə sizi ümumi Gürcüstan adından təbrik edir, cansağlığı və uzun ömür arzulayıram. Qoy dualarınızla qəlbimizdə əmin-amanlıq, evlərimizdə firavanlıq, bütün yer üzündə sülh bərqərar olsun. Qoy sizin dualarınız və qayğınızla güclənən Gürcüstan çoxlu xoşbəxt yeni illər qeyd etsin” – Salome Zurabişvili təbrik məktubunda yazır.