Rusiyada, rus neftinin idxalına embarqo qoyulacağı təqdirdə Moskvanın Almaniyaya təbii qaz tədarükünü dayandıracağı bildirilir. Bu barədə Rusiyanın vitse-baş naziri Aleksandr Novak bəyanat verib.

“Bizim cavab tədbirləri görmək üçün və “Şimal axını-1” qaz kəməri vasitəsilə təbii qazın tədarükünə embarqo tətbiq etməyə tam hüququmuz var”-deyə Rusiyanın vitse-baş naziri bildirib.

Onun sözlərinə görə, “Rusiya neftindən imtina dünya bazarına fəlakətli nəticələr gətirəcək”. Onun proqnozuna görə, belə olan halda “qara qızıl”-ın qiyməti bir barel üçün 300 dollara çatacaq.

Novakın sözlərinə görə, Aİ-nin tez bir zamanda Rusiya neftinə alternativ tapması qeyri-mümkündür.

Bununla yanaşı, BBC-nin yaydığı məlumata görə, Almaniya və Hollandiya plana qarşı çıxsa da, ABŞ artıq Rusiya neftinin idxalına embarqo tətbiq etmək imkanını öyrənir.

Hazırda Aİ zəruri neftin 30%-ni, təbii qazın isə 40%-ni Rusiyadan alır.