Rusiyanın Ermənistandakı səfiri – ABŞ Ermənistanla münasibətləri Rusiya ilə qarşıdurma kontekstində nəzərdən keçirir və bu, Ermənistan-Rusiya münasibətlərinə xələl gətirə bilər

ABŞ Ermənistanla münasibətləri Rusiya ilə qarşıdurma kontekstində nəzərdən keçirir ki, bu da Ermənistan-Rusiya münasibətlərinə xələl gətirə bilər”, – bu barədə Rusiyanın Ermənistandakı səfiri Sergey Kopirkin bildirib.

“Təəssüf ki, münasibətlərimiz daha geniş mübahisə obyektinə çevrilir və ABŞ bunu gizlətmir. Onlar açıq şəkildə Ermənistanla münasibətlərə Rusiya və İranla qarşıdurma kontekstində baxdıqlarını deyirlər. Bu, çox təhlükəlidir və Ermənistan tərəfinin bizim münasibətlərimizin bütün spektrini qorumaq üçün kifayət qədər siyasi iradəsi olmasa, Ermənistan-Rusiya münasibətlərinə real ziyan vura bilər, bu, sadə insanlar üçün çox vacibdir”, – Sergey Kopirkin bildirib.

Rusiyalı diplomat onu da qeyd edib ki, 2020-ci ildə Ermənistanın baş naziri Nikol Paşinyanın şəxsi xahişi ilə Rusiya sərhədçilərinin müşahidə məntəqələri Ermənistan və Azərbaycan sərhədində yerləşdirilib. Rusiyanın Ermənistandakı səfiri bildirib ki, Rusiya Ermənistana qarşı xarici təcavüzə məruz qalacağı təqdirdə müttəfiq öhdəliklərini yerinə yetirməyə hazırdır və silah tədarükü ilə bağlı öhdəliklərinə ciddi yanaşır.