Rusiya tərəfindən Xarkov şəhərinə həyata keçirilmiş raket hücumu nəticəsində azı 6 nəfər həlak olub. Bu haqda məlumatı Xarkov Regional Dövlət Administrasiyasının rəhbəri Oleq Sinequbov yayıb.

Onların verdiyi məlumatda, raket hücumu nəticəsində 16 nəfərin yaralandığı deyilir. Fövqəladə Hallar Xidmətinin nümayəndələri hadisə yerinə səfərbər olunublar.

Ukraynanın Prezidenti hadisəyə sosial şəbəkədə münasibət bildirib. Volodimir Zelenski, Rusiya tərəfindən Xarkova hücumların Ukraynanın hava hücumundan müdafiə vasitələrinə malik olmaması və Ukrayna sərhədi yaxınlığında yerləşdirilən Rusiyanın texnikasını məhv edə bilməməsi səbəbindən mümkün olduğunu deyib. O, Rusiyanın Xarkov istiqamətində 15 raket buraxdığını bildirib.

“Terror hər yerdə, istənilən şəraitdə, istənilən qitədə məğlub olmalıdır. Həyatı terrordan qorumaq bizim, bütün dünyanın, imkanı olan hamının ümumi məsuliyyətidir. Ukrayna əlindən gələni edir. Bizə kömək edən hər kəsə minnətdarıq. Ancaq daha çox əzm lazımdır. Konkret olaraq dünya liderləri tərəfindən”- Zelenski sosial şəbəkədə yazır.