Rusiya Ermənistandan karantin nəzarətində olan məhsulların idxalını tamamilə qadağan edib

Russia Ermənistandan karantin nəzarətinə aid məhsulların idxalını tamamilə qadağan edib. Siyahıya tərəvəz, meyvə, giləmeyvə, qoz-fındıq məhsulları, qəhvə və onlarla digər məhsul növü daxildir.

Rusiya Federasiyasının Kənd Təsərrüfatına Nəzarət üzrə Federal Xidməti iyunun 12-dən etibarən Ermənistandan Rusiyaya bütün karantin məhsullarının idxalını, eləcə də onların Avrasiya İqtisadi İttifaqı üzvü olan digər ölkələrə tranzitini məhdudlaşdırır.

Qurumun açıqlamasına görə, Ermənistandan gətirilən məhsullarda mütəmadi olaraq karantin obyektləri (zərərvericilər və xəstəliklər) aşkarlanır və erməni tərəfinə edilən xəbərdarlıqlara baxmayaraq, problem hələ də aradan qaldırılmayıb.

Bundan əlavə, “Rosselxoznadzor”un iddiasına əsasən, iyun ayında erməni mənşəli fındıq, qurudulmuş şaftalı və qurudulmuş pomidorda kapra böcəyi aşkarlanıb.

Karantin məhsullarına yüksək fitosanitar risk daşıyan mallar aid edilir.

“Rosselxoznadzor”un saytında dərc olunmuş siyahıya çiçəklər, tərəvəzlər, meyvələr, giləmeyvələr, taxıl bitkiləri, tütün, ağac materialları və bir çox digər məhsullar daxildir.

Qeyd edək ki, “Rosselxoznadzor” erməni məhsullarına məhdudiyyətlər tətbiq etməyə hələ may ayında başlayıb. Əvvəlcə çiçəklərin idxalı qadağan edilib, daha sonra Jermuk mineral suyunun idxalına qadağa qoyulub, sonradan isə məhdudiyyətlər çiçəklərə, tərəvəzlərə, çiyələyə, quru meyvələrə və digər məhsullara da şamil olunub.

Xatırladaq ki, Rusiya nəzarət orqanları müxtəlif ölkələrdən məhsul idxalına mütəmadi olaraq qadağalar tətbiq edir və bu hallar çox vaxt Moskva ilə həmin ölkələr arasında münasibətlərin pisləşdiyi dövrlərə təsadüf edir. Belə hallar 2006-cı ildə gürcü və moldovan şərabları və mineral sularına, 2014–2015-ci illərdə Polşa meyvə və tərəvəzlərinə, 2015-ci ildə isə Türkiyə pomidorlarının idxalına qoyulan məhdudiyyətlər zamanı da müşahidə olunub.