Rusiya hökuməti dizel yanacağı və aviasiya kerosininin ixracına qadağa qoyulması imkanını nəzərdən keçirir. Bu barədə Rusiya mediası öz mənbələrinə istinadən məlumat yayıb.

Məlumata görə, məsələ mayın 26-da Rusiya baş nazirinin müavini Alexander Novakın rəhbərliyi ilə keçirilən müşavirədə müzakirə olunub. Toplantıda yanacaq bazarındakı vəziyyət ətrafında fikir mübadiləsi aparılıb.

Mənbələrin bildirdiyinə görə, məhdudiyyətlər yaxın vaxtlarda qüvvəyə minə və bir-iki ay davam edə bilər.

Interfax agentliyinin mənbələrindən biri qeyd edib ki, dizel ixracının tam qadağan olunması az ehtimal edilir, çünki bazarda kifayət qədər məhsul mövcuddur.

Rusiyada artıq aprelin 1-dən etibarən benzin ixracına tam qadağa tətbiq olunur və bu qərar iyulun 31-dək qüvvədə qalacaq. İxracın dayandırılmasına səbəb yanacaq qiymətlərinin artması olub ki, bu da Yaxın Şərqdə davam edən müharibə ilə əlaqələndirilir. May ayında Ukrayna dronlarının neft emalı zavodlarına endirdiyi zərbələr fonunda Rusiyanın yanacaqdoldurma məntəqələrində benzin qıtlığı da yaranıb.