Rus mediasının məlumatına görə, iyunun 18-də Moskvaya qarşı həyata keçirilən Ukrayna hücumu son iki ildə ən genişmiqyaslı hücum olub

Ukrayna Prezidenti Volodimir Zelenski Ukrayna Silahlı Qüvvələrinin Moskva Neft Emalı Zavoduna endirdiyi zərbəni təsdiqləyib. Cari həftə ərzində Ukrayna ordusu Rusiya paytaxtında yerləşən Kapotnya Neft Emalı Zavoduna ikinci dəfə hücum edib.

“Bu həftə Moskva Neft Emalı Zavoduna ikinci dəfə zərbə endirildi. Həmçinin Rusiyanın Rostov vilayətində və Ukraynanın müvəqqəti işğal altında olan ərazilərində də hədəflər vuruldu. Bu, Rusiyanın şəhərlərimizə qarşı həyata keçirdiyi hücumlara tamamilə ədalətli cavab və Rusiya hərbi maşınını təmin edən obyektlərə qarşı hərbçilərimizin fəaliyyətinin növbəti mühüm nəticəsidir. Bu müharibənin başa çatmasının vaxtıdır. Rusiya diplomatiya istiqamətində lazımi addımları atmalıdır”, – deyə Zelenski bildirib.

Rusiyanın dövlət informasiya agentliyi İTAR-TASS-ın məlumatına görə, iyunun 18-də Moskva istiqamətində həyata keçirilən Ukrayna hücumu son iki ilin ən genişmiqyaslı hücumu olub.

Moskva meri bildirib ki, hücum zamanı təxminən 200 pilotsuz uçuş aparatı məhv edilib. O, həmçinin bir nəfərin yaralandığını açıqlayıb.

Hücum səbəbindən Moskvanın cənub-şərq hissəsində avtomobil hərəkəti müvəqqəti məhdudlaşdırılıb. Bundan əlavə, paytaxtın dörd hava limanının fəaliyyəti də müvəqqəti olaraq dayandırılıb.