ABŞ prezidenti Co Bayden, dövlət katibi Entoni Blinken və biz hamımız tərəfdaşlığımızı və dostluğumuzu daha da dərinləşdirməyi səbirsizliklə gözləyirik-bu barədə Amerika Birləşmiş Ştatlarının Gürcüstandakı fövqəladə və səlahiyyətli səfiri Robin Danniqan Gürcüstanın Baş naziri ilə görüşdən sonra açıqlayıb.

O, ABŞ-ın müxtəlif istiqamətlərdə Gürcüstanı dəstəklədiyini bildirib.

“Baş nazirlə bugünkü görüşü yüksək qiymətləndirirəm. Baş nazirə dedim ki, prezident Bayden, katib Blinken və biz hamımız tərəfdaşlığımızı və dostluğumuzu daha da dərinləşdirməyi səbirsizliklə gözləyirik. Dostluğumuzun və tərəfdaşlığımızın 31 ili ərzində ABŞ Gürcüstana müxtəlif istiqamətlərdə – təhsil və səhiyyə sektorlarında, eləcə də infrastrukturun inkişafında dəstək verib. Gürcü əsgərləri isə Əfqanıstanda, İraqda və Kosovoda Amerika əsgərlərinə dəstək verib. Həmçinin, baş nazirə dedim ki, Gürcüstanın Qərbə, Avropa İttifaqına və NATO-ya inteqrasiyasında irəliləyişini dəstəkləməyi səbirsizliklə gözləyirəm. Xalqlararası və iqtisadi əlaqələrimizi genişləndirmək istəyirəm. Belə ki, mən bu ölkəni və gürcü xalqını daha yaxından tanımağı səbirsizliklə gözləyirəm”- deyə Robin Danniqan bildirib.

Məlumatı Gürcüstan hökuməti yayıb.