ABŞ səfirliyinin Tbilisi komandası adından bütün gürcülərə sağlam, xoşbəxt bayramlar arzulayıram, ABŞ səfirliyində hamımız ABŞ və Gürcüstan arasında tərəfdaşlığı dəstəkləməkdən qürur duyuruq, – bu barədə ABŞ-ın Gürcüstandakı səfiri Robin Daniqanın yeni il videomüraciətində deyilir.

Səfirin sözlərinə görə, ABŞ Gürcüstana dəstəyini davam etdirir.

“Biz – səfirlikdə olan amerikalılar çox şanslıyıq ki, bu gözəl ölkədə yaşayırıq. Biz hamımız Gürcüstanın zəngin mədəniyyətini, qonaqpərvərlik ənənəsini və ən əsası gözəl və mehriban insanlarını həqiqətən yüksək qiymətləndiririk. Qarşıdan yeni il gəlir və mən bir daha bütün gürcüləri bu il Avropa İttifaqına namizəd statusu əldə etməklə nail olduqları böyük uğurlar münasibətilə təbrik etmək istəyirəm. ABŞ Gürcüstanı Avro-Atlantik inteqrasiya yolunda dəstəkləmək üçün birlikdə gördüyümüz işdən çox qürur duyur və əlbəttə ki, biz dəstəyimizi davam etdirməyə və onsuz da möhkəm olan strateji tərəfdaşlığımızı daha da dərinləşdirməyə tamamilə sadiqik. Sizə, ailələrinizə və yaxınlarınıza sevgi və cansağlığı dolu xoşbəxt bir yeni il arzulayıram”, – deyə səfir bildirib.