Türkiyənin Prezidenti Rəcəb Tayyib Ərdoğan Fələstin Administrasiyasının lideri Mahmud Abbasa Türkiyənin İsrailə təzyiqi davam etdirəcəyini deyib. Məlumatı “Reuters” yayır.

Ərdoğan, Ankaranın Fələstinə dəstəyi davam etdirəcəyini və beynəlxalq ictimaiyyəti İsrailə təzyiqi artırmağa sövq edəcəyini bildirib.

Liderlər həmçinin son vaxtlarda inkişaf etmiş hadisələri nəzərdən keçiriblər və Qəzzada uzunmüddətli atəşkəs və sülh üçün atılması lazım olan addımları müzakirə ediblər.

Türkiyənin Prezidenti bir daha Qəzzada davam edən müharibəni qınayıb və bəzi Qərb ölkələrini səssiz qalmaqda və İsraili dəstəkləməkdə ittiham edib.

Ərdoğanın Abbasa dediyi kimi, bütün ölkələr, xüsusilə də müsəlman aləmi Qəzzada atəşin dərhal dayandırılması və fələstinlilərə humanitar yardımın fasiləsiz çatdırılması üçün səylərini artırmalıdır.

Fələstin Administrasiyasının lideri avqustun 15-də Türkiyə Parlamentində çıxış etməlidir.

“Biz, Netanyahunun ABŞ Konqresində çıxış etmək hüququnun olduğu kimi, Abbasın da parlamentimizdə çıxış etmək hüququnun olduğunu göstəririk” – Ərdoğan Abbasla görüşdən əvvəl deyib.