Gürcüstanın ədliyyə naziri Rati Breqadze Dövlət Təhlükəsizlik Xidməti rəhbərinin keçmiş müavini Soso Qoqaşvilinin ailə üzvləri ilə görüşdüyünü təsdiqləyir. Bu barədə nazir Gürcüstanın Birinci Kanalına açıqlayıb.

Breqadze , görüşün Qoqaşvilinin müraciəti əsasında baş tutduğunu və sözügedən görüşün qanunvericilik normalarına ciddi riayət olunmaqla həyata keçirildiyini bildirib.

“Gürcüstanda, o cümlədən penitensiar müəssisələrdə ifadə azadlığı təmin edilir. Bu səbəbdən cənab Qoqaşvilinin danışdıqlarını və hansısa konspirasiya nəzəriyyəsini şərh etməkdə çətinlik çəkirəm. Əgər onun nəsə sübutu varsa, müvafiq orqanlara müraciət etməlidir” – deyə Rati Breqadze bildirib.

Tbilisi Şəhər Məhkəməsi Dövlət Təhlükəsizlik Xidmətinin keçmiş rəis müavini Soso Qoqaşvili barəsində iyulun 18-də həbs qətimkan tədbiri seçib.

Dövlət Təhlükəsizlik Xidmətinin əməkdaşları iyulun 16-da İoseb Qoqaşvilini saxlayıblar. O, Gürcüstan Cinayət Məcəlləsinin 333-cü maddəsinin birinci hissəsi ( dövlətin qanuni mənafeyinin əhəmiyyətli dərəcədə pozulması ilə nəticələnmiş vəzifəli şəxs tərəfindən vəzifə səlahiyyətlərini aşma ), 157-ci maddəsinin 4-cü hissəsi və 236-cı maddəsinin 3-cü hissəsi (qanunsuz olaraq odlu silah və döyüş sursatı əldə etmə və saxlama) ilə ittiham olunub, bu da cəza ölçüsü olaraq dörd ildən yeddi ilədək müddətə azadlıqdan məhrum etməni nəzərdə tutur.