Oktyabrın 7-dən sonra Qəzza sektorunda İsrailin hərbi əməliyyatı 40 000-dən çox insanın həyatını itirməsi ilə nəticələnib. Bu haqda məlumatı Qəzza sektorunun səhiyyə xidməti yayır.

Qurumun məlumatına əsasən, bu rəqəm bölgədə yaşayan 2,3 milyon əhalinin təxminən 1,7 faizinə bərabərdir. Həlak olanların əksəriyyəti uşaqlar, qadınlar və ya qocalardır.

Cari ayda İsrail hərbçiləri müharibə zamanı 15 000-dən çox terrorçunu öldürdüklərini bildiriblər. Bir neçə ekspertin sözlərinə əsasən, Qəzzada birbaşa müharibə nəticəsində həlak olanların real sayı ehtimal ki, daha çoxdur. Yerli şəxslərin qiymətləndirməsinə görə, İsrailin hava hücumları nəticəsində zərər görmüş binaların dağıntıları altında təxminən 10 000 cəsəd qalır.

Ərəb anklavında, bu müddət ərzində İsrailin hərbi əməliyyatı nəticəsində 92 401 nəfərin xəsarət aldığını deyirlər. İtkilərdən əlavə, peyk görüntülərinin təhlili Qəzzada binaların təxminən 60 faizinin zədələndiyini və ya dağıldığını göstərir. Son bir neçə ay ərzində ən çox ziyan ölkənin cənubunda yerləşən Rafah şəhərinə dəyib.

Məlumat üçün bildirək ki, Qəzza sektorunda müharibə “HƏMAS”ın minlərlə döyüşçüsünün oktyabrın 7-də İsrailin cənubuna daxil olmasından sonra başlayıb. İsrail tərəfinin göstəricilərinə əsasən, əməliyyat nəticəsində təxminən 1200 nəfər həlak olub, 251 nəfəri isə girov götürüblər.