Gürcüstan Baş Prokurorluğunun məlumatına görə, ABŞ Dövlət Departamentinin terrorla bağlı hesabatında Gürcüstan Prokurorluğunun rolu müsbət qiymətləndirilir.

Prokurorluğun məlumatına görə, Dövlət Departamentinin saytında dərc olunan hesabata əsasən, 2022-ci ildə Gürcüstan terrorizmlə mübarizə məsələlərində fəal iştirakını davam etdirib və ABŞ-ın güclü müttəfiqi olaraq qalıb.

“Hesabatda qeyd olunur ki, ABŞ Dövlət Departamenti Gürcüstanda terrorizmlə bağlı vəziyyəti, o cümlədən Gürcüstanın dövlət qurumlarının terrorizmlə mübarizədə fəaliyyətini müsbət qiymətləndirir və bu məsələdə Gürcüstan Prokurorluğunun rolu da qeyd olunur.”

“Gürcüstanda terrorla bağlı vəziyyət sakit və sabit idi. Gürcüstan, ümumiyyətlə, terror hadisələrini aşkar etmək, qarşısını almaq və onlara cavab vermək iqtidarındadır. Gürcüstanın Dövlət Təhlükəsizliyi Xidməti terrorizmlə bağlı işləri araşdırmaq səlahiyyətinə malikdir və Terrorla Mübarizə Mərkəzi vasitəsilə Gürcüstan Prokurorluğu da daxil olmaqla, qurumlarla sıx əməkdaşlıq edir”, – hesabatda deyilir.

Hesabatda qeyd olunur ki, 2022-ci il ərzində Gürcüstanda heç bir terror hadisəsi baş verməyib, baxmayaraq ki, Gürcüstanın Dövlət Təhlükəsizlik Xidməti İslam İnqilabı Keşikçiləri Korpusu ilə əlaqəsi olan iranlıların rəhbərlik etdiyi İsrail vətəndaşına sui-qəsd planının qarşısını alıb.

“Gürcüstanın Cinayət Məcəlləsi terrorizmi dəstəkləyən fəaliyyətləri, o cümlədən terrorizmi maliyyələşdirməyi, kiberterrorizmi, təlim və təlimatlandırmanı, terrorizmə təhrik etməyi və terorizmə çağırışı və terror təşkilatlarına, o cümlədən əcnəbi döyüşçülərə qoşulmağı cinayət hesab edir”, – hesabatda deyilir.

ABŞ Dövlət Departamenti Gürcüstanın ABŞ-ın güclü tərəfdaşı kimi göstərildiyi 2022-ci il üçün terrorla mübarizə hesabatını dərc edib.