Polşa Respublikasında keçirilən 32-ci Karpaç İqtisadi Forumu çərçivəsində Gürcüstan nümayəndə heyəti panel müzakirəsində iştirak edib. Bu barədə Gürcüstan Xarici İşlər Nazirliyinin mətbuat xidməti məlumat yayıb.

Gürcüstan tərəfdən əsas çıxış edənlər Gürcüstanın xarici işlər nazirinin müavini Aleksandre Xvtisiaşvili və iqtisadiyyat və davamlı inkişaf nazirinin müavini Vaxtanq Tsintsadze olub. Polşa tərəfdən isə müzakirələr panelində Seymin Xarici Əlaqələr Komitəsinin sədr müavinləri Barbara Bartus və Pavel Koval iştirak ediblər: Panelin moderatoru “Business Insider Georgia”nın rəhbəri Giorgi Abaşişvili olub.

Gürcüstan nümayəndə heyətinin çıxışlarında Gürcüstan və Polşa arasında tarixi əlaqələr və müxtəlif sahələrdə uğurlu əməkdaşlığa xüsusi diqqət yetirilib. Panel müzakirəsində xarici işlər nazirinin müavini Gürcüstanın Avropaya inteqrasiya gündəliyinin nəzərdən keçirilməsinə xüsusi diqqət yetirib, nazir müavini Gürcüstanın Avropa Komissiyasının müvafiq tövsiyələrini necə yerinə yetirdiyi barədə ətraflı danışıb.

Ölkənin mühüm tranzit funksiyasına və bununla bağlı Gürcüstanda həyata keçirilən mühüm infrastruktur layihələrinə və ölkənin iqtisadi potensialına xüsusi diqqət yetirilib.