Planlaşdırılır ki, beynəlxalq və daxili dövlət əhəmiyyətli avtomobil yollarının saxlanması və istismarı ilə məşğul olacaq dövlət şirkəti yaradılacaq

İnfrastruktur Nazirliyi beynəlxalq və ölkə daxili əhəmiyyətli avtomobil yollarının tam və ya qismən saxlanması və istismarını onun idarəçiliyində olan özəl hüquqi şəxs vasitəsilə həyata keçirmək səlahiyyətinə malik olacaq. Bu məqsədlə dövlət şirkətinin yaradılması planlaşdırılır.

Parlamentə təqdim edilən qanun layihəsində qeyd olunur ki, son illərdə ölkədə həyata keçirilən genişmiqyaslı infrastruktur layihələri nəticəsində yolların texniki mürəkkəbliyi əhəmiyyətli dərəcədə artıb. Buna çoxzolaqlı avtomagistralların, körpülərin və tunellərin sayının artması, eləcə də nəqliyyat axınının intensivləşməsi daxildir.

Hökumətin izahına görə, bu amillər yolların istismar xarakterini əsaslı şəkildə dəyişir və idarəetmənin daha texnoloji, fasiləsiz və preventiv modelə keçməsini tələb edir.

Qanun layihəsində xüsusi olaraq E60 avtomobil yolunun Qori–Arqveta hissəsinə diqqət çəkilir. Bu 105 kilometrlik sahə 138 körpü və 59 tuneldən ibarətdir. O, Şərq–Qərb tranzit dəhlizinin əsas komponentlərindən biri kimi ölkənin nəqliyyat sisteminin “onurğa sütunu” hesab olunur və onun düzgün işləməsi iqtisadi aktivlik və tranzit potensialı ilə birbaşa bağlıdır.

Mövcud modeldə yol xidmətləri bir neçə podratçıya bölünərək həyata keçirilsə də, müasir infrastrukturun artan mühəndislik tələbləri fonunda daha koordinasiyalı və inteqrasiya olunmuş idarəetməyə ehtiyac yarandığı bildirilir. Böyük maliyyə resurslarının cəlb olunmasına baxmayaraq, hazırkı model müasir yol idarəetmə tələblərinə tam cavab vermir və sistemli təkmilləşdirmə tələb edir.