Biz Gürcüstanın Avropa İttifaqına üzv olmasını istəyirik, istəyirik ki, Gürcüstan bu ilin dekabrında Avropa İttifaqı Şurası tərəfindən namizəd statusu alsın -bu barədə Almaniyanın Gürcüstandakı səfiri Peter Fişer Gürcüstanın Birinci Kanalına açıqlayıb.

O, namizəd statusu alınacağı təqdirdə Aİ-yə üzvlüklə bağlı danışıqlar başlayacağını, lakin bunun üçün Gürcüstanın lazımi addımlar atması gərəkdiyini deyib.

“Biz Gürcüstan üçün 12 prioritet səsləndirmişik və bu tövsiyələrin həyata keçirilməsində, indi xüsusilə ədalət mühakiməsi və de-oliqarxizasiya istiqamətində mühüm irəliləyiş görmək istəyirik. Biz Gürcüstanın Aİ norma və standartlarına daha da yaxınlaşmasını görmək istəyirik. Ölkə bəzi tövsiyələri yerinə yetirib, digərləri halında isə biz əhəmiyyətli irəliləyiş görmək istərdik”- deyə Peter Fişer açıqlayıb.