Yeni hökumətin doqquz addım üzərində çox işləməyə hazır olması barədə namizədliyi təqdim olunmuş yeni baş nazirin bəyanatları ümidvericidir-bu haqda Aİ-nin Gürcüstandakı səfiri Pavel Herçinski jurnalistlərə açıqlayıb.

Herçinski, tövsiyələrlə bağlı işin əhatəli və müxalifətin konstruktiv olacağına ümid edir.

“Biz hamımız Gürcüstanın rəsmi olaraq Aİ üzvlüyünə namizəd ölkə olmasını qeyd edirik. Bu barədə qərar ötən ilin dekabrın 14-də Avropa İttifaqının dövlət və hökumət başçıları səviyyəsində qəbul edilib. Bu müsbət xəbərlə yanaşı, 27 üzv ölkənin dövlət və hökumət başçıları Gürcüstanın Avropa İttifaqına daxil olmaq yolunda irəliləməsi üçün həyata keçirməli olduğu 9 addımı təsdiqləyib. Doqquz addımı nə qədər tez həyata keçirəcəyi gürcü siyasi elitasının qərar verəcəyi məsələdir. Gürcüstanın bu ildən növbəti mərhələyə keçə bilməsi üçün biz öz tərəfimizdən mümkün qədər tez irəliləməyə hazırıq. Növbəti mərhələ Avropa İttifaqına daxil olmaq üzrə danışıqlara başlamaqdır, lakin bu, bizim, Avropa İttifaqının və Brüsselin əlində deyil, gürcü siyasi elitasının əlindədir. Səmimi qəlbdən ümid edirəm ki, bütün siyasi qüvvələrin iştirak edəcəyi iş əhatəli olacaq, eyni zamanda, müxalifət konstruktiv olacaq, vətəndaş cəmiyyəti tam şəkildə iştirak edəcək və seçkilərdən asılı olmayaraq – təbii ki, seçkilərə çox diqqət yetiriləcək – eyni zamanda, doqquz addımın həyata keçirilməsi istiqamətində işlər davam etdiriləcək. Gürcüstanın doqquz addımın həyata keçirilməsi baxımından irəliyə getməsi üçün gələn həftə təsdiqlənəcək yeni hökumətin doqquz addım üzərində bizim köməyimizlə çox işləməyə hazır olması barədə namizədliyi təqdim olunmuş yeni baş nazirin bəyanatları ümidvericidir” – Pavel Herçinski açıqlayıb.