Parlamentlərarası İttifaq assambleyanın bugünkü iclasında Ukraynanı dəstəkləyən qətnamə qəbul edib. Sözügedən qətnaməni Gürcüstan parlamentinin sədri Şalva Papuaşvilinin rəhbərlik etdiyi parlament nümayəndə heyəti dəstəkləyib.

Qətnamə Çili və Cənubi Amerika qrupu tərəfindən hazırlanıb. Qətnamə Rusiyanı bir daha Ukraynada hərbi əməliyyatları dayandırmağa, Ukraynanın ərazi bütövlüyünə və beynəlxalq hüquq normalarına hörmət etməyə çağırır.

Ukrayna Radası sədrinin birinci müavini Oleksandr Kornienko Gürcüstana dəstəyə görə təşəkkür edir.

“Gürcüstan qətnaməni dəstəklədi və biz Ukraynadan Gürcüstanın, onun parlamentinin bu hərəkətinə görə minnətdarıq, çünki bu qətnamə təkcə bu müharibədə bizim problemimizlə bağlı deyil, dünya problemlərinin səbəbkarı Rusiyadır. Qida böhranları, nüvə təhlükələri, soyqırım anları. Bütün bunları biz bu səkkiz ay ərzində Ukraynada gördük. Ölkələr arasında heç kim müharibə istəmir. Məhz bu səbəbdən bu qətnaməni dəstəkləmək çox vacibdir. Ümid edirəm ki, komitə öz işinin öhdəsindən layiqincə gələcək və önümüzdəki günlərdə assambleyanın dəstəkləyəcəyi tam bəyanatımız olacaq. Gürcüstan və Ukrayna dost ölkələrdir. Biz bu səkkiz ay ərzində gürcü xalqının dəstəyini aldıq və bu dəstəyə görə parlamentinizə minnətdarıq” – deyə Oleksandr Kornienko bildirib.

Gürcüstan parlamentinin nümayəndə heyəti parlamentin sədri Şalva Papuaşvilinin rəhbərliyi ilə Ruandanın paytaxtı Kiqalidə keçirilən Parlamentlərarası İttifaqın (PAİ) 145-ci Assambleyasının fəaliyyətində iştirak edir. Papuaşvili Ruandada keçirilən Parlamentlərarası İttifaqın Assambleyasının iştirakçıları qarşısında çıxış edib.