Dublində ATƏT Parlament Assambleyasının sessiyası çərçivəsində Gürcüstan Parlamentinin Xarici Əlaqələr Komitəsinin sədri, Gürcüstanın ATƏT Parlament Assambleyasındakı nümayəndə heyətinin rəhbəri Nikoloz Samxaradze ATƏT Parlament Assambleyasının prezidenti Pia Kauma ilə görüşüb. Eyni zamanda, o, ATƏT Parlament Assambleyasının Gürcüstandakı müşahidə missiyasına rəhbərlik edəcək.

Görüşdə Gürcüstanın və ümumilikdə regionun təhlükəsizlik mühiti və işğalın çətinlikləri müzakirə olunub. Söhbətdə oktyabrın 26-na təyin edilmiş parlament seçkiləri və partiyaların bu mühüm siyasi hadisəyə hazırlığı, seçkiqabağı mühit, seçki kampaniyasının gedişi, eləcə də mövcud qanunvericilik bazası və media mühitindən söhbət açılıb.

Xarici Əlaqələr Komitəsinin sədri vurğulayıb ki, Gürcüstan hökuməti azad seçkilərin keçirilməsində maraqlıdır və bütün müvafiq beynəlxalq aktorları seçkiləri müşahidə etməyə, seçki prosesini obyektiv və qərəzsiz qiymətləndirməyə çağırır.

Nikoloz Samxaradze həmkarlarına sosial-iqtisadi vəziyyət və gözləntilər, o cümlədən Gürcüstanın müxtəlif istiqamətlərdə əldə etdiyi irəliləyişlər barədə də məlumat verib.

Məlumatı Gürcüstan parlamentinin mətbuat xidməti yayıb.