Ermənistanın Baş naziri Nikol Paşinyan noyabra qədər sülh sazişinin imzalanması ideyası ilə razı olduğunu bildirir.

Bu haqda Nikol Paşinyan mətbuat konfransında danışıb.

“Bunun üçün sülh sazişində ictimai olan və danışıqlar platformalarında razılaşdırılmış bütün prinsipləri qeyd etmək lazımdır. Bu prinsiplər təqdim edilməli və imzalanmalıdır, mən bu məntiqlə razıyam. Ümid edirəm ki, yaxın gələcəkdə Ermənistan və Azərbaycanın xarici işlər nazirlərinin Almatıda keçiriləcək növbəti görüşündə bu irəliləyiş qeydə alınacaq” – Paşinyan bildirib.

Bununla yanaşı, erməni mediasının məlumatına əsasən, Paşinyan razılaşdırılmamış prinsiplər məsələsinin necə həll olunacağını açıqlamayıb.

Nikol Paşinyan Azərbaycanla sərhəddə Tavuş vilayətində demarkasiya prosesi çərçivəsində sərhəd sütunlarının quraşdırılmasından danışıb. Baş nazir bildirib ki, Ermənistanın təhlükəsizliyini yalnız sülh təmin edə bilər və Tavuş vilayətində yerləşdirilmiş sərhəd sütunları Ermənistanın təhlükəsizliyinin təminatıdır.

“Yalnız sülh Ermənistanın təhlükəsizliyini təmin edə bilər. Biz ölkənin təhlükəsizliyinin təmin edilməsi vasitəsi kimi dinc gündəliyi qəbul etmişik və təhlükəsizlik təminatı sistemi kimi onu həyata keçiririk. Tavuş vilayətində yerləşdirilən sərhəd sütunları Ermənistanın təhlükəsizlik zəmanəti sütunlarıdır. Biz bu sütunların sayını artırmaq üçün hər şeyi edəcəyik”- deyə Ermənistanın Baş naziri deyib.

Nikol Paşinyan mətbuat konfransında Ermənistanın daxili və xarici strategiyasını təqdim edib.

“Bizim regional mühitimiz belədir: Gürcüstan və İranla mehriban qonşuluğu dərinləşdirmək və inkişaf etdirmək, Türkiyə və Azərbaycanla düşmənçiliyi idarə etmək, azaltmaq və sıfıra endirmək, regional nəqliyyat inteqrasiyası, iqtisadi əlaqələrin qurulması, dərinləşdirilməsi və inkişafı. Biz təhlükəsizliyin təmin edilməsini xarici əlaqələrimizin şaxələndirilməsində, orduda islahatların aparılmasında, ümumi təhlükəsizlik və müdafiə sisteminin tətbiqində görürük. Bütün bunlar legitimliyə əsaslanmalıdır. Məhz iqtisadi inkişaf şəraitində bütün bu tezisləri həyata keçirmək mümkündür” – Paşinyan açıqlayıb.