Seçkilər baş tutdu, Levan Xabeişvilini bu nəticə münasibətilə təbrik edirəm, ona partiyanı ləyaqətlə və həqiqətlə idarə etməsini arzulayıram – bu barədə “Milli Hərəkat”ın sədrliyinə namizədlərdən biri Nika Melia açıqlayıb.

Melianın qeyd etdiyi kimi, o, partiyada qalır.

“Ölkəni idarə etmək, eyni zamanda hakimiyyəti dinc yolla təhvil vermək təcrübəsi olan “Milli Hərəkat” partiyasında seçkilər başa çatdı. Bu ənənəni bu partiya yaradıb. Bu seçkilərdə dövlətimizin vəziyyətindən asılı olaraq kimisə qalib və ya məğlub adlandırmaq fikrimcə çətindir. Ölkədə siyasi məhbuslar var – Mixeil Saakaşvili, Nika Qvaramia, çünki indiki hakimiyyət dövründə ölkənin xarici siyasət kursu təəssüf ki, Rusiyanın orbitinə doğru çox güclü şəkildə dəyişir. Məhz bu amillərdən irəli gələrək, bu seçkidə kimisə qalib və ya məğlub adlandırmaq çətindir.

Əminəm ki, yaxın gələcəkdə hamımız birlikdə qalib gələcəyik – gürcü cəmiyyəti, gürcü dövləti qalib gələcək, onun gələcəyi parlaq olacaq. Əminəm ki, çoxlu mühacir bu ölkəyə qayıdacaq və hazırda davam edən əhalinin boşalması tendensiyası sonlanacaq.

Bütün bunlara baxmayaraq, seçkilər baş tutdu. Seçkinin konkret qalibi var və bu nəticə münasibətilə onu təbrik edirəm. Mən konkret olaraq Levan Xabeişvilini təbrik edirəm. Ona mənim üçün çox vacib olanı, partiyanı ləyaqətlə və həqiqətlə idarə etməyi arzulayıram. Onun bunu bacaracağına ümid etmək istəyirəm.

2013-cü ildən qoşulduğum bu mübarizədə qalmağıma heç kim şübhə etməməlidir. Təbii ki, bu mübarizənin avanqardında olacağam”- deyə Melia açıqlayıb.