NATO sözçüsü – Rusiya NATO-ya qeyri-rəsmi sənəd göndərib, biz də cavab göndərmişik, NATO müdafiə ittifaqıdır və fəaliyyətimiz Rusiyanın heç bir hissəsi üçün təhlükə yaratmır

Təsdiq edə bilərəm ki, Rusiya NATO-ya qeyri-rəsmi sənəd (non-paper) göndərib və biz də cavab göndərmişik; həmin cavabda qeyd etmişik ki, NATO müdafiə ittifaqıdır və bizim heç bir fəaliyyətimiz və ya hərbi təlimimiz Rusiyanın hər hansı bir hissəsi üçün təhlükə yaratmır, – bu barədə NATO sözçüsü Alison Hart bildirib.

Bu məlumatı “Europaevskaya Pravda” yayır.

“Biz hər hansı məsuliyyətsiz nüvə ritorikası da daxil olmaqla, güc tətbiqi təhdidini qətiyyətlə pisləyirik”, – Hart qeyd edib.

NATO sözçüsünün bildirdiyinə görə, alyans Rusiyanı Ukraynadakı əsassız müharibəsini dayandırmağa çağırıb.

“Rusiyanın hibrid taktikalardan istifadə etməsi çarəsizlik əlamətidir, lakin bu, bizi Ukraynaya dəstək verməkdən imtina etməyə məcbur edə bilməz. Alyansa üzv ölkələrin ərazisinin hər bir santimetrini qorumaq üçün lazım olan hər şeyə sahibik; biz hələ də güclüyük, tam hazır vəziyyətdəyik və istənilən təhlükəyə qarşı fəaliyyət göstərmək iqtidarındayıq”, – deyə NATO-nun bəyanatında deyilib.

Bundan əvvəl Rusiyanın İrlandiyadakı səfirliyinin mətbuat xidməti “NATO ölkələri Kalininqrad bölgəsini təcrid etməyə çalışarsa, Rusiya nüvə silahları da daxil olmaqla bütün arsenalından istifadə etməyə hazır olacaq” deyə bəyanat yayıb.